Magpies player thar Jacob Murphy

Premier League kai thar Newcastle United chuan England Under-21 international Jacob Murphy chu Norwich City aṭangin pound mak­taduai 12-in an lalut.

Kum 22-a upa winger hi Norwich youth system chhuak a ni a, season hman zawh takah khan Championship match 41 khelin goal 10 a khung - a goal khung zingah hian Magpies laka a goal khung pahnih pawh a tel.

Murphy hi a naupan tet aṭanga Newcastle ṭantu a ni a, a club ṭan em em ṭhin a zawm thei chu a hlim hle. Ireland-a Magpies training zawm nghaltu winger chuan, "Newcastle tana khelh phak hi ka naupan tet aṭanga ka chak a ni a, inkhelh hlan ka nghakhlel tawh hle a ni," a ti.

Newcastle manager Rafa Benitez chuan, "Player naupang leh talent nei ṭha tak a ni a, he hmunah hian a hma zawng aia hma a sawn theih ka beisei. Keinin kan duh ber chu season hmasa Championship-a a inpekna, duhna leh theihna a pholan ang kha kan hnenah pawh hian pholang ve se tih hi a ni," tiin a player thar chungchang a sawi.