Chhinga Veng - Nuam Nuam Nuam

Lalbiakliana Memorial MFA Super Cup-ah Chhinga Veng FC-in first division club Venghlui FC lakah goal hnih chhuah hmasa mah se goal thumin an chhanglet a, 3-2 in an chak.

Nimin Lammual inkhel a hmuh­­­nawm takzet - Vanrammawia Ngen­te-in Venghlui FC tan bul a ṭan a, Chhinga Veng FC defender K. Lalthlahlova'n an lamah a tauh lut zui a, minute 14-na lekah 2-0 a ni. Amaherawhchu, minute 90 a zawh meuh chuan MPL club danglamna a lang a, Chhingcows-in Malsawmfela, Lalrinchhana leh MS Dawngliana te goal hmangin an chhanglet.

Chhinga Veng hian a vawi khat nan MFA Super Cup final an lut a, Thawhṭanni khian Chanmari West nen final an khel ang.

Chhingcows an buai
Chhinga Vengin quarterfinal-a Bethlehem Vengthlang an hneh zawhah first division club an hmachhawn dawn avangin final thleng tawhah an inngai hial ang.

Nimahsela Venghlui FC-in pal zam mai tur an ni lo tih lantirin VR-a'n minute rukna lekah goal hmahruai a khung a, Kolasib tlangval tan he goal mawi hi tun inelnaa a goal 10-na niin match tinah a pet goal kim vek.

Chhinga Veng ṭantute hlauh­thawnna belhchhah turin minute 14-naah semifinal-a chakna goal khungtu Patea'n an lamah a tauh lut.

Venghlui FC ṭantute an lawm a, an ban phakah final a awm tawh avangin an thawm a ring sawt.

Thawhlehna
Chhinga Veng squad a chhah ṭhat avangin goal hnih chhuah vang­in an buai lo a, an goal nawr na sawt.

Venghlui FC an ṭang thei a, keeper Vannunmawia'n Chhinga Veng forward Malsawmfela goal khung tur ṭha zet a dan sak a. Chhing­cows tlarhma finishing a tawih tawk lo.

Venghlui tlar hnungin tawnhriat an neih tlem an tuar - minute 43-naah Robert Tluanga'n box chhungah Chhing­cows forward Lalrammuan-puia a titlu a, referee-in penalty a pe. MPL5 best player Malsawmfela'n cool takin a khung a, beiseina thar an neih phah bawk.

Second half-ah Venghlui forward VR-a'n a hun ṭha neih a hlah a, an tawrh phah zui bawk. Minute 60-naah R. Malsawmtluanga'n corner ṭha zeta pet chu vengtu nei lo captain Lalrinchhana'n a tauh a, Venghlui FC defender H. Lalrohlupuia'n an lamah a pal lut a, 2-2 a ni.

Minute hnih hnuah Chhinga Veng forward Dawngtea'n hma­hruaina goal a khung zui lehnghal a, MPL club an chung­nung chhunzawm bawk.

Venghlui keeper Vana'n hna a ngah a, Chhinga Veng tlarhma finishing a ṭhat loh avangin goal dang a luh belh tawh lo.

Sanga thukhawchang
Chhinga Veng coach Lalsang­zuala Hmar chuan, "Kan thla a muang lutuk a, inkhelh ṭan tir lama kan muthlu kha kan tuar a ni," tiin an bul ṭan dan a fuh loh thu a sawi.

Sanga chuan, mipui fakin, "Chhinga Veng ṭantu­ten min au phur a, player-ten inthlahdah loin theihtawp an chhuah a, hnehna kan chang hram. Duhthusamin a khelh reng thei lo a, final kan thleng hi kan lawm a ni," tiin Vanglaini a hrilh.