Police aia tlo Chanmari West

Mizoram Police leh Chanmari West-in nimin tlai khan minute 120 chhungin goal khat ve ve an khung a, penalty shootout-ah West Warrior-in 6-5 inhnehna an chang.

Lalbiakliana Memorial MFA Super Cup-a inpuahchahna nei ṭha ber chu Police an ni a, mahse Police hmaah Chanmari West an tlo a, an huaisenna leh vanneihna rah sengin final an lut.

Rin loh zawk

Inpuahchahna nei ṭha Police chu chak tura rin an ni a, khelmual chhungah erawh West Warrior an chungnung zawk.

Chanmari West midfielder pathum Jacob Lalrawngbawla, Lalromawia leh Lalrintluanga-te inkawp an hmuhnawm. Shillong Lajong midfielder hlui Jacob-a ball fing chu Ramhlun South tlangval Remruata'n minute 24-naah tawih zetin a pet goal.

Hemi hnu hian Jacob-a'n box pawn aṭangin ṭha zetin a pet a, Police keeper ṬP-a'n a dang ṭha hle.

Bang rinawm

Second half-ah Police goal nawr a na a, Chanmari West-in an goal khat neih venhim hna an thawk. CWFC captain Ronald Zothanzama chu tlarhnungah bang rinawm a ni.

Police-in chance ṭha bik an insiam thei lo - West Warrior-in minute 90 chhung Police an dang.

Vanneihna

Injury time-ah Chanmari West tan inhliam vanga inkhel bul ṭan lo Lalnunmawia'n ball per a chang fuh a, goal chance ṭha ni thei hi offside (?) tihsak a ni.

Hemi hnu hian Police-in nawr letin Fakzuala'n goal ban a tauh per a, Valpuia'n si phurh sut nan a hmang - hun pangngaiah chak zawk an awm lo.

A goal lo

Extra time-ah Police chu rinkai an ni chhunzawm a, amah-erawhchu West Warrior naupang rual an zam bik lo. West Warrior winger Remruata'n ṭha taka ball lakluh chu kawh zetin goal-ah a pet a, Police keeper ṬP-a'n a dang ṭha hle.

Police lam pawhin chance ṭha an nei a, keeper Malsawma dan ṭhat tawk loh vangin captain V. Lalṭan-puia'n chance ṭha a nei a, a tauh over.

Malsawmna Malsawma

Minute 120 chhungin West Warrior keeper Malsawma'n ṭum thum ball a man sual a, an lamah goal luh phah loh mah se Police an phûr phah. Penalty shootout-ah erawh Malsawma'n keeper ṭha a nih tih pho-langin Police tana pet hmasa pahnih F. Lalrinpuia leh Lalruatpuia te pet a dan-sak nghal.

West Warrior chak turah inngai mah se Police keeper Lalṭhapuia leh Mawitea te penalty pet a dan sak ve thung ang. Sudden death-ah Chanmari West midfielder Lalengmawia'n pet goal lo mah se Police defender Lalhmunmawia penalty pet chu Malsawma'n a dang ve leh! Vawi kua an petnaah West Warrior captain Ronald-a'n a pet goal a, Police captain Ṭ-a pet Malsawma'n a dan sak thung.

Chanmari West coach HC Zarzoliana chuan, "Malsawma'n vawi hnih a dan kha chuan kan chak mai turah kan ngai a, mahse rin ang ngawtin thil a kal lo. Kan vannei takzet a ni," tiin Vanglaini a hrilh.

Inkhel Result
Mizoram Police 1 - 1 Chanmari West FC
Penalty Shootout-ah 6-5 in CW FC an chak
MPFC : F. Lalrinpuia 90+1'
CWFC : Lalremruata 24'

Penalty Pet Dan
Chanmari West
Calvin Zosiamliana G
Lalromawia G
Lalmawizuala G
Lalṭhapuia X
Lanunmawia X
Tlangthanpuia G
Lalengmawia X
Vanlalthlamuana G
Ronald Zothanzama G

Mizoram Police
F. Lalrinpuia X
Lalruatpuia X
R. Vanlalhriata G
F. Zosangliana G
Lalbiakhlua G
Simon Lalruatkima G
Lalhmunmawia X
MC Lalthanzauva G
V. Lalṭanpuia X