Coutinho hralh tum lo Reds

Barcelona-in pound maktaduai 72-a Philippe Coutinho lak­luh an tumna chu Liver­pool in an hnawl tih thuthang karah Reds ma­nager Jurgen Klopp chuan player an hralh loh tur thu a sawi.

German coach chuan, "Club dang­in ka player-te an duh a nih chuan mak ka ti hran lo. Mahse, hma­sawn tum club kan ni a, chu kan thil tum ti hlawhtling tur chuan kan thawhho reng a ṭul a ni," a ti.

Klopp chuan sawi chhunzawmin, "Liver­pool-in player kan nei ṭha tih hi mi tam takin an hre ve vek a, mahse an hriat tur pawimawh em em chu player hralh ṭhin club kan ni lo tih hi a ni, " tiin a sawi.

Brazil international Coutinho hian season hman zawh takah khan kar ruk chhung hliam vangin khelmualah a hmel a lan thei lo a, heti chung hian goal 14 a khung.