I Day Football-ah India Under 19 team an tel dawn
Independence Day Celebration Football Tournament 2017 chu July 28 aṭangin Aizawlah khelh ṭan a ni dawn a, inelna hming hi sponsor hming chawiin Great Sports Independence Day Cup tih a ni.
Kumin I Day Football-ah hian Mizoram Premier League club pariatte bakah state pawn aṭangin team pahnih dang sawm an ni a, All India Football Federation Under 19 team chuan an tel theih tur thu an tichiang tawh.
AIFF U19 ṭha zawk
Nikum I Day Football-ah AIFF Under 19 sawm an ni tawh a, India rama rawlthar ṭha rual Mizo club ṭha zingah an che thei lo.
AIFF Under 19 hi Group A-ah Aizawl FC, Chanmari FC leh Chhinga Veng nen an awm ho a, Chhingcows chauh hnehin team pali awmnaah pathumna niin knockout stage-ah an tla.
Hetih lai hi coach Floyd Pinto hnuaia khel Under 19 team indin ṭhat chhoh lai a ni a, hemi hma season-a player pawimawh Anirudh Thapa, Prosenjit Chakraborty, Jerry Lalrinzuala, Baoringdao Bodo leh Bedashwor Singh ten AIFF Academy an chhuahsan chiah avangin beisei an pha lo hi mak lo.
Floyd Pinto chuan, "I Day Football-a champion turin kan lo kal a, inbuatsaihna kan neih ṭhat tawk loh avangin kan result duh ang kan nei lo. Tun hi kan tawpna tur a ni lo a, champion tumin Mizoramah rawn let ngei kan tum ang," tiin a sawi - team ṭha zawk nena an rawn kir tur hi tualchhung football tana thu lawmawm a ni.
AIFF Elite Academy hian I League Under 18-ah an nomawi an humhim a, SAAF Cup leh Asian Football Confederations Junior Championships qualifier khel tura inbuatsaih mek an ni.
Lawmman
I Day Football-ah hian champion team-in Rs 1,00,000 leh trophy an dawng ang a, pahnihnain Rs 50,000 an dawng ang. Semi finalist pahnihin Rs 10,000 an dawng ang a, Fair Play Award siam a ni a, Rs 10,000 a keng tel ang.
Inkhel apiangin a chakin Rs 3,000 dawngin a chak loin Rs 2,000 zel an dawng ang a, an in hneh tawk a nih chuan Rs 2,000 ve ve an dawng ang.
Hei bakah hian mimal lawmman pahnih siam a ni - Top Scorer leh Best Player thlan an ni ang a, trophy bakah Rs 3,000 ve ve an dawng ang.
Independence Day Football 2017 atan hian Great Sports Infra chu main sponsor a ni.
Hmeichhe inelna
Kuminah hian kum hmasa ang bawkin hmeichhe pualin Independence Day Football hi khelh a ni dawn bawk.
MFA Womens Committee lamin hma thar lain a kalpui dan tur pawh an duang mek a, tun ṭumah hian zirna in behchhana team hrang hrang inelna kalpui tum a ni.