Manchester Derby-a goal khungtu Lukaku

Pound maktaduai 75 man Romelu Lukaku-a'n Manchester Derby-a khelh hmasak berah goal a khung nghal a, Jose Mourinho hoten Pep Guardiola naute 2-0 in an hneh.

Nimin zing inkhelah hian Manchester United tan Lukaku leh Marcus Rash­ford ten goal an khung a, friendly match-ah hian United aiin City lamin player tawnhriat nei tam lo an chhawr hnem zawk.

Jose Mourinho chuan, "Ka lawm. Pep pawh a lawm ve ngei ka ring. Team pahnih tan season thar atana training ṭha tak neih hi a hlu a ni," tiin team pahnih khelh dan hmanga a lawm thu a sawi.

United tana thu lawm­awm chu Lukaku-a'n goal satliah lo a khung. Belgian striker hian Manchester City keeper thar Ederson Moraes a tlan pelh hnu­ah angle zim takin aṭangin harsatna nei loin a khung. English rawlthar duhawm Rahsford-a'n goal hmangin hmabak a nei êng a ni tih a pholang bawk.

Pound maktaduai 35 man keeper Moraes-a'n goal hnih a chhuah a, FIFA Confederations Cup-a best goalkeeper Claudio Bravo thlak zo tur khawpin a la khel ṭha lo. City tana lawmna tur chu kum 17 mi Phil Foden-a'n a khelh ṭhat vangin sawi zui a hlawh a, English midfielder hi May 28, 2000 piang niin India rama khelh tur FIFA Under 17 World Cup-a Eng­land U17 tlin theih nan player pawimawh a ni.

Inkhelh banah Pep Guardiola chuan, "Ka thil hmuh kha thua han sawifiah dan ka thiam lo. A khelh dan kha mi naran chunglam a ni a, club a hmangaih a, City ṭantu a ni a, club tan chuan thilpek a ni. Player danglam bik a nih avangin tun season-ah chuan kan bulah a awm dawn a, ṭhiante tan chance ṭha a siam thiam a ni," tiin Foden a fak a, kum 17 mi chauh ni mah senior team zinga a awm tel tur thu a sawi.