Naktukah player an lilam dawn e!

November aṭanga khelh tur Indian Super League-a player turte chu Pathianni hian an lilam dawn.

ISL club 10 ten Indian player 200 an inchuh dawn. ISL season hmasa pathumah club pariat chiah an awm a, kuminah erawh club pahnih an awm belh dawn.

I League-a vawi hnih champion tawh Bengaluru FC chuan I League hnuchhawnin ISL khelh an thlang a, Tata Steel enkawl Jamshedpur FC chuan a vawi khat nan inelna an hmachhawn ve dawn bawk. I League champion-in AFC Champions League playoff an khelh dawn laiin ISL champion hian AFC Cup playoff an khel thung ang.

Engtikah maw?

ISL draft hi naktuk zing dar 10:00-ah The St. Regis Hotel, Mumbai-ah neih a ni dawn a, player 200-te hi lilam an ni ang. ISL draft hi ISL broadcast partner Star India chuan live-in a pe chhuak dawn lo a, Hotstar-ah internet kaltlangin live streaming-in en theih a ni dawn thung.

Star India hian ISL draft hi a pe chhuak lo tawp dawn tihna erawh a ni lo. July 25, July 31 leh August 7-ah draft bihchianna neih tur a ni dawn a, Star Sports 2-ah dar 9:00 PM-ah en theih a ni ang.

Player chelh theih

ISL draft neih a nih hmain club-te chu season hmasaa an player zingah senior player pahnih leh Under 21 player pathum thleng chelh theihna pek an ni a, club thar Jamshedpur FC-in chelh tur an nei lo tih lohah Delhi Dynamos chuan an player neih sa tumah chelh loh an ti tlu.

Mahse, ISL club zingah senior player pahnih chelh an awm chuan round thumna aṭang chauhin draft hi an chhim thei dawn a, U21 player zingah India tana inkhel tawh an awm a nih chuan senior player anga chhiar tur an ni. Chumi awmzia chu Chennaiyin FC-in U21 player an chelh Jerry Lalrinzuala chu India tana inlan tawh a nih avangin round lina aṭang chauhin draft an chhim thei dawn.

Inlan tur zat

ISL draft-ah player 200 an awm a, player-te hian club an nei vek kher dawn lo. ISL club-te chu squad-a player 25 nei tura tih an ni a, a tlem berah Indian player 15 nei tura tih an ni a, ramchhung player 18 aia tam neih phal a ni lo thung. Club tinin U21 player pahnih tal an kawl ṭheuh tur a ni, tih a ni bawk.

Indian player 23-in club an nei chiang tawh sa a, ISL club-te hian Indian player an neih theih zat tam ber 18 ṭheuh nei ta pawh ni se player 200 hi hralh vek an ni dawn lo tihna a ni. ISL club ten Indian player an kawl theih zat 18 ṭheuh hi kawl ta se Indian player awm zat tur chu 158 tihna a ni a, player 23-in club an neihsa avangin draft aṭanga club nei tur chu 135 tihna a ni.

Kawng a awm?

ISL draft aṭangin a tam berah Indian player 135 lei an ni dawn a, a tlem thei ang bera chhut pawhin player 65 chuan club an nei dawn lo tihna a ni. Heng player lei lohte hian eng nge an tih tak ang? tih zawhna a awm thei a, a chhanna chu additional player ni chungin an awm thei ang, tih a ni deuh tlawng.

Club tinte hi additional player pathum ṭheuh an neih phal sak an ni a, draft aṭanga thlanchhuah ni ve lo player-te aṭangin additional player hi neih tur a ni. Additional player hi season laklawha player inhliam an awma an aiawh tura tih an ni. ISL club 10-ten phalsak an nih angin player pathum

ṭheuh lakbelh ta se player 35 bak an chuang tawh dawn lo tihna a ni. Hei erawh beiseina chauh a ni a, ISL club-te hian an duh chuan additional player an la kher lo thei a, pathum zingah hian ram pawn player pakhat lak phalsak an ni bawk.

Player lei dan

ISL draft-ah round 15 thleng a awm dawn a, player phochhuah lei thei hmasa ber tur chu club thar Jamshedpur FC an ni ang. Tata Steel enkawl club-in player an chhan hmasak ber theih chhan hi club thar an nih vang a ni a, first round leh second round-ah player an thlang hmasa ber thei dawn a ni. Delhi Dynamos chuan player chelh an neih loh avangin Jamshedpur dawta player lei tur an ni ang.

Round 15 thleng player lilamna hi neih a nih dawn avangin Jamshedpur leh Delhi Dynamos hi duhsak reng theih an ni bik dawn lo. Inrinni tlaiah round tina club-ten player lei hmasa thei tur pawhna (draw) an nei dawn a ni.