Mizo 16 telna ISL draft

Indian Super League draft-ah Mizo 16 an awm dawn. Tun dinhmunah Jeje Lalpekhlua leh Jerry Lalrinzuala te chu Chennaiyin FC-in an chelh a, Daniel Lalhlimpuia leh Malsawmzuala chu Bengaluru FC-in an chelh bawk. Draft-a awm Mizo 16-te hian club khelhna tur an nei vek a nih chuan ISL-ah Mizoram player 20 kan hmu dawn tihna a ni.

Draft-a awm Mizo zingah Lalrindika Ralte man a to ber a, Lunglei tlangval man inṭanna zat hi nuai 48 a ni. Bengaluru FC defender hlui Lalchhuanmawia Fanai man inṭanna zat chu nuai 45 a ni a, draft-a Mizo player dang zingah nuai 40 hawlh pha an awm rih lo.

I League khelh zawh taka Bengaluru player zingah Chhuantea bakah Beikhokhei Beingaichho (nuai 10), Lalhmangaihsanga Ralte (nuai 27) leh Lalthuammawia Ralte (nuai 38)te chu draft-ah an tel vek bawk.

I League-a Aizawl FC champion puitu zingah Lalruatthara (nuai 25), Zohmingliana Ralte (nuai 25) leh Lalṭhakima (nuai 10)-te chu player lilam tur zingah an tel a, Mumbai FC defender Lalchhawnkima (nuai 10), Lalrempuia Fanai (nuai 8) te chu ISL club chil tiputtu zinga tel tura beisei an ni.

Mizo legend S. Malsawmtluanga'n (nuai 15) kum tam lam pan ve tawh mah se Indian football-ah erawh a la hlu reng tih lantir nan draft-ah a hming hmuh tur a awm a, East Bengal defender Robert Lalthlamuana (nuai 25) man a la tam viau bawk.

DSK Shivajians player zingah K. Lalṭhathanga, Lallianzuala Chhangte leh Jerry Mawihmingthanga te chu draft-ah awm mah se an man inṭanna tur zat ala chiang lo a, Shillong Lajong midfielder duhawm Isaac Vanmalsawma man zat tur a la chiang lo bawk.

Shillong Lajong-a contract la nei Isaac chuan, "Club hotute leh ka agent ten inbiakna an nei a, club lamin draft-a ka tel hi an lo remtih avangin ISL draft-ah hian ka tel dawn a ni. Kan man inṭanna tur zat erawh a la hriat theih loh a, inbiakna a la kal mek," tiin Vanglaini a hrilh a, he thuziak i chhiar meuh chuan a chiang hman tura beisei a ni.