Chennai Open hming an thlak

India ram chhunga ATP tournament ngaihhlut pakhat Chennai Open chu nakkum aṭangin Pune-ah khelh a ni tawh dawn a, inelna hming hi "Maharashtra Open" tia thlak a ni nghal dawn bawk.

Maharashtra State Lawn Tennis Association (MSLTA), Maharashtra Sorkar leh IMG-Reliance te chu he inelna a thu­neitu an ni a, anni pathum hian Ningani khan Chennai Open hming thlak a nih thu an puang.

Maharashtra chief minis­ter Devendra Fadnavis chuan, "Maharashtra Open hi ATP inelna zinga world class tournament ni turin kan buat­saih dawn. Player lian leh lang­sar zawk hip thei turin kan bei chhunzawm ang," tiin a sawi.

India rama ATP 250 event hriathlawh hi January thlatir a khelh ṭhin a ni a, Grand Slam hmasa ber Australian Open inbuat­saih nan hman ṭhin a ni. Tun hmain Stanislas Wawrinka leh Marin Cilic te pawh an inlan tawh ṭhin.

Chennai Open doubles nomawi vawi nga chawi tawh Mahesh Bhupathi ngaihdan erawh a dang, "Chennai hi Australian Open inbuatsaih nana hmun ṭha ber pakhat a ni, a boruak lum dan leh hnawn dan vel hi Melbourne nen a inan em avangin player tan Grand Slam hmasa ber inbuatsaih nan a ṭha hle," tiin European player ten Chennai-a inkhelh an duh thu a sawi, Pune chu hmun ṭha zawk a nih loh thu a sawi tel bawk.