Dan lo angin Mbappe an dawr - Kylian Monaco

Monaco chuan Europe club lian ṭhenkhat chu dan kalha an rawlthar striker Kylian Mbappe dawrah an puh.

Kum 18 mi Mbappe hi Europe club lian dang nen sawi zawm a ni a, chung zingah chuan Arsenal, PSG leh Real Madrid te chu hming langsar an ni.

Monaco chuan, "Europe club lian ṭhenkhatin kan phalna la loin Mbappe an dawr a. Danah chuan club hian player contract a sawi pui dawn a nih chuan a club khelh mekna hnenah phalna a la hmasa tur a ni," tiin thuchhuah an siam a, dan bawhchhe club hming erawh an tarlang lo.

Ligue 1 club Monaco chuan, "Mbappe dawrtu hian French Football League leh FIFA dan an pal zut a, an chet dan hriattiam harsa tak hi tihtawp kan tum a nih chuan French Football League leh FIFA hnuaia kan zualko hial a ṭul ang," tiin an player dawrtute an vau.

French forward Mbappe hian season liam ta khan goal 27 a khung a, chung zinga 15 chu league inelnaa a khung niin Monaco-in Ligue 1 an champion-na kawngah player pawimawh a ni.

French club hian season ṭha tak an hmang avangin an player awttu an tam a, an player pawimawh Bernardo Silva leh Tiemoue Bakayoko te an chhuhsak tawh a, an player ṭha dang Mbappe, Thomas Lemar, Djibril Sidibe, Benjamin Mendy leh Fabinho te chu chhuak thei dinhmunah an ding bawk.