Africa Cup of Nations khelh hun an sawn ; African player-te an hlut sawt beisei a ni

January leh February thla a an khelh ṭhin Africa Cup of Nations chu June leh July thlaah khelh a ni tawh dawn a, ram 16 inel ṭhin chu ram 24 an ni tawh bawk ang.

Africa rama football thu­neitu sang Confederation of African Football (CAF) exe­cutive committee chuan he an thultukna lian tak pahnih hi July 20 khan an puang a, kum 2019-a Cameroon-in an thlen hunah hman ṭan tur a ni ang.

Kumin thleng kha chuan Africa Cup of Nations hi European League khelh hunlai taka khelh ṭhin a ni a, Europe club lian ṭhenkhat chuan an mamawh hunah tak an player pawimawh ṭhenkhat an chân ṭhin. Football agent pakhat Papa Agyemang chuan inkhelh hun sawn a nih takah chuan club lian lamin African player an duh phah sawt a beisei thu a sawi.

Papa Agyemang chuan, "Agent hna a ti awlsam sawt dawn, club ṭhenkhat chuan inelna hun hmasa avang khan African player lakluh an hreh ṭhin. Team ṭhenkhatin an mamawh hun lai taka player an chhawr theih loh ang kha a thleng tawh dawn lo a, European club lian tak takin an player duhzawng chu lak an hreh phah tawh lo ang," tiin a sawi.

Chelsea leh Ghana coach hlui Avram Grant-a agent ni ṭhin Saif Rubie chuan, "Club ṭhenkhat chuan 100% in African player an duh loh thu min hrilh ṭhin. An hnualsuat chhan hi January leh February thlaa an chan fo vang a ni, tunah chuan he harsatna hi a reh tawh ang," tiin a sawi ve bawk.

Sadio Mane kha...

Season hmasa khan Liver­pool-in bul an ṭan ṭha a, Janaury thla a thlen hma kha chuan champion tura rinkai zingah an tel phak. Mahse, season hun pawimawh lai ber pakhatah an star player Sadio Mane chuan Africa Cup of Nations a khelh vangin Reds-in a tel loin hun harsa an tawng.

Senegal forward Mane a inlan theih chuan Liverpool hian an league match bikah 63% hnehna an chang thei a, a tel lo erawh chuan 45% chiah hnehna an chang thei. Tournament aṭanga Senegal an tlak veleh an player haw nan private jet an ruahman sak nghal hial.

Mane awm loh hlan hian Reds hian League Cup-ah Southampton an hneh lo a, FA Cup lamah pawh Championship club Wolves hneh loin an tla bawk.

Liverpool boss Jurgen Klopp pawhin, "Africa Cup of Nations hi inelna lian leh ropui tak a ni a, harsatna hrang hrang karah hun rei tak chhung an kalpui tawhna hi ka zah hle, chutih rualin a khelh hun avang hian ngaihdan pawh a hrang ve thei hle bawk," tiin a lo sawi tawh.

Beisei an nei

Season hmasa khan Premier League khel player zinga 23 zet chu Africa Cup of Nations-ah an inlan a, Liverpool bakah hian club tam takin harsatna an tawk tih chu thu chiang awm sa a ni.

Europe lama African player tamtak aiawh ṭhintu Agyemang chuan, "African player-te hlutna a zual ngei dawnin ka hria, an man a to nghal hluai dawn ka tihna a ni kher lo. Mahse, club tana an hlutna a zual tawh dawn avangin nghawng chu a neih ngei ka beisei," a ti. African player-te man a to sawt dawn ti chiah lo mah se a thusawi aṭang­in manto zawka hralh theih an nih a beisei tih a chiang.

Cameroon goalkeeper hlui Joseph-Antoine Bell chuan, "Player, mipui leh ram tan inkhelh hun an thlak hi chu a fuh hlein ka hria. Club-in hlawh neiin player an chhawr a, an mamawh vanglai taka an ram tana an kalsan ṭhin hi chu thil fuh ber a ni lo a ni," tiin a sawi ve bawk.