Kashyap-a'n Lee Hyun a hneh
US Open Grand Prix Gold badminton tournament khelh mekah India tlangval Parupalli Kashyap chuan seeded pakhatna Lee Hyun Il chu a match hmasa berah a hneh.
Ningani khan Commonwealth Games champion Kashyap hian world number 15 Lee Hyun lakah hian darkar khat leh minute thum chhungin 21-16, 10-21, 21-19 in hnehna a chang.
World number 59 Kashyap hian Hungarian shuttler Gergely Krausz a hmachhawn zui leh nghal a, 21-19 21-10 a hma a hruai laiin a khingpui hi hliam vangin a inhnukdawk.
Seeded pangana Sameer Verma chuan a dar na a dam chiang tawh tih lantir nan Vietnam tlangval Hoang Nam Nguyen chu 21-5, 21-10 in a sawp ve bawk. National champion Sameer hian Zvonimir Durkinjak a bitum zui ve leh nghal bawk a, harsatna nei loin hnehna a chang.
Inkhel dangah Indian shuttler tho H S Prannoy pawhin second round lut turin Luka Wraber chu 21-12, 21-16 in a hneh ve bawk. Hmeichhe singles lamah Rituparna Das leh Krishna Priya Kudaravalli te pawhin an match hmasa berah hnehna an chang ve bawk.