Beiseina nen India U17 coach Matos

India Under 17 coach Luis Norton de Matos chuan FIFA World Cup U17 an khelh turah mipui beiseina sang lo mah se inkhel hmuhnawm tak pholang tura theihna an neihsan thu a sawi.

October 6-28, 2017-ah FIFA U17 World Cup chu India-ah khelh a ni dawn a, a thlengtu India hi Group A-ah USA, Colombia leh Ghana te nena awmhoin an match hmasa ber chuOctober 6 khian Delhi khawpuiah USA nen an khel ang.

Portuguese coach chuan, "Dik taka sawi chuan kan hmaa match inchhawpa hnehna chan chu kan tan a harsa dawn. Group a kan awmpuite hi team ṭha tak tak vek an ni a, hnehna channa chance kan neih hi 5% vel a ni. Mahse, chu kan chance chu sual chhuak turin theihtawp kan chhuah ang a, mite hmuhnawm tih khawpa kan khelhchhuah theih ka ring tlat," tiin beiseina a nei.

Matos chuan inelna thlengtu an nih avanga an khingpuite an cho sual a hlauh thu sawi nghalin, "Inelna thlengtu nih vanga hnehna chang tura kan indah a nih chuan a atthlak khawp ang. Ghana leh Colombia hian Delhi boruakah harsatna an nei dawn miah lo a, USA hian harsatna an neih loh nan Dubai khawlumah training an nei mek bawk," a ti.

Benfica B team boss hlui chuan tun hnaia Europe-a tour an neih aṭangin Indian player-ten hma an sawn nasat thu leh European player-te nen an intluk tawk reng thu a sawi a, hotu niloa hruaitu nih a duh thu a sawi bawk.