Chennaiyin-ah Raphael Augusto a nghet
Indian Super League club Chennaiyin FC chuan Brazilian midfielder Raphael Augusto chu season hnih chhung an hnena khel tura contract an ziahpui thu an tarlang a, South Indian club-ah hian kum 2019 thleng a khel dawn tihna a ni.
Kum 26-a upa midfielder hian Brazilian club Fluminese aṭangin Chennaiyin hi ISL 2015 ṭan dawn khan loan-in a zawm a, season hmasaah pawh khan Super Machans tan hian a khel. Augusto hian Major League Soccer club DC United leh Polish club lian Legia Warsaw tan pawh a lo khel tawh a, tun season-ah pawh Chennai club tan player
ṭangkai a ni leh ang.
Hetihlai hian Chennaiyin FC hian season thara Premier League khel tur Brighton and Hove Albion defender hlui Inigo Calderon an lalut bawk. Spanish defender hian English football-a hun a hman hmain an ram club Alicante leh Alaves-ah hun a lo hmang tawh bawk.
Kum 35-a upa defender hi Brighton-a hun a hman laiin fan-te lawm hlawh ber pawl player a ni a, League One an khelh laiin 2010-11 season-ah khan PFA Team of the Year-ah hial a lang phak. Defender nichungin league-ah goal riat a khung a, Championship a inhlankaipui a ni.
Aston Villa boss hlui, Chennaiyin coach thar John Gregory chuan Augusto chu a coaching staff ten an fak avanga chelh a nih thu a sawi a, Calderon chu English football-a hun a hman lai aṭang tawha a hriat chian a nih thu a sawi bawk.