Man United-in thawhlehna'n Liverpool an hmang!

Premier League match thum an khelhah a vawi khat nan Manchester United an chak a, an hneh chu an hmelma kumhlun Liverpool an ni - Erik ten Hag-a enkawl team hian 2-1 in hnehna an chang.

Thawhṭan zan zanlai pelha Old Trafford-a inkhelah United tan Jadon Sancho leh Marcus Rashford ten goal khat ve ve an khung a, Liverpool tana Mohamed Salah goal khungin awmzia a nei phak lo - Reds hi league match thum an khelh tawhah an la chak lo!

Season ṭan hmaa Manchester City nena inel ber tura ngaih Liverpool hi 16-na an ni mek a, he team hian champion an tum tak tak a nih chuan insiamṭhat ran an mamawh.

United erawh an match hmasa pahniha an tlawm hnuah Liverpool lakah an chak a, Reds hmang khera harhtharna an chan avangin fans an phur lehzual sawt ang tih a chiang a, beiseina nen season an thlir e!

Thutlukna huaisen
Liverpool an mikhual hmain United hian club naran Brentford chu khualmualah 4-0 in an ngam lo a, Ten Hag-a thinrimin Pathiannia player-te chawlh a titawp a, training-naah 13.8 kilometre a tlan belh tir bawk - Brentford player-te an intawn ṭuma 13.8 km-a an tlan tam zawk vang a ni!

Erik ten Hag-a'n a player-te chu an theihna zawng zawnga khel turin a duh a, Liverpool lakah huaisen takin thutlukna a siam zui - sawisel hlawh tak captain Harry Maguire chu bench-ah dahin, Cristiano Ronaldo pawhin bul a ṭan lo.

Ten Hag-a duh a chiang a, chu chu team inlungrualna leh beih hram hram a ni - chutianga khel chhuak tura a duh team-ah chesual ngun tak Maguire leh chhuah duh vanga kawhmawh bawl Ronaldo tan hmun a awm lo a, thutlukna huaisen a siam.

Dutch coach duh ang ngeiin United hian a tir aṭangin an nawr nghal a, rawlthar beiseiawm Anthony Elanga chu tlan pût zawkin Liverpool lakah chance a nei a, mahse, goal post a tihper - a finishing a ṭha tawk lo a ni.

Red Devils an hrang
Liverpool an insiamrem hman lo - Old Trafford-a inkhelah United-in mualneitu an ni tih an inhria a, mahni buzawlah mikhual team ngam loa tlawm an tum lo. A bik takin Liverpool lakah!

Minute 16-naah United hian goal an khung ta nge nge - ṭha taka ball an inpek kual hnuah Jadon Sancho chungah mawhphurhna a tla a, English forward hian Elanga ball pek chu a duhthala a control hnuah Alisson Becker man theih loh turin a khung.

United goal lut tur hi James Milner-a'n chhuhsak tum mah se a hlawhtling lo a, Virgil van Dijk-a'n a hnaih chilh vat dawn emaw tih laiin a en reng a, a goal - Milner hian VVD hi khelmualah a au khum nghal a, Dutch defender-in a tihsual tih hriain a chhâng let lo.

Liverpool-in si phurh sut an tum a, mahse, an tihleithei lo. Corner aṭanga ball kal chu buai nuai karah a goal mai dawn niin a lang a, mahse, khel ṭha em em mai Lisandro Martinez chuan goal line aṭangin a lo pet chhuak hman.

United bawk
Liverpool fan-ten si phurh sutna goal hmuh an inbeisei a, an hmuh erawh United goal bawk a ni - halfway line bawr velah VVD leh Jordan Henderson ten hliam damkawr Anthony Martial an chuh hneh lo a, French forward hian Rashford tan a siamsak.

Kum 24 mi striker hian minute 997 zet United tana goal a khung tawh loh hnuah theihna a la nei reng tih pholangin goal-ah a chantir a, Old Trafford thawm chu ring tak a ni.

Liverpool-in beiseina nei lo tawp erawh an ni bik lo a, minute 81-naah bench aṭanga luhtir Fábio Carvalho chuan goal-ah a pet a, hemi per lehlam hi Salah chuan si phurh sut ṭhenna ni turin a khung.

Klopp-a nauten point hlawh chhuak turin minute kua an la nei a, an goal bawh nat tawk loh bakah United-in hun an khawhral thiam avangin goal dang a lut tawh lo. Season hmasaa 5-0 ngawta an chakna khelmualah Reds-in beisei an phak lo a, a tawpah United an chak.

Liverpool buaina
Jurgen Klopp-a'n khawvela team hlauhawm ber pawlah Liverpool a din a, nomawi chawi theih zawng zawng a chawipui bawk - hei vang tak hian Reds chungah beisei a sang a, mahse, tun season bul an ṭan dan erawh Liverpool ṭantu tan chuan mangchhia ang mai a ni.

Liverpool tan squad-a player langsar zingah Ibrahima Konate, Joel Matip, Thiago Alcantara, Curtis Jones, Alex Oxlade-Chamberlain, Naby Keita leh Diogo Jota te chu an la inhliam reng a, striker man to Darwin Nunez chu hrem vangin match thum a chawlh a ṭul bawk.

United laka bench-a awm player en ila, kum 17 mi Stefan Bajcetic, kum 17 mi midfielder Bobby Clark leh kum 18 mi goalkeeper Harvey Davies te chu Liverpool tana la inlan lo an ni.

Kum 20 mi Sepp van den Berg hian Reds tan match li khel tawh mah se Premier League la khel lo a ni a, centre back Nat Phillips lah season hmasa lawka loan-a an chhuahtir kha a ni a, Klopp-a'n mangan laia koh tur bench-ah a nei lo tih a lang.

Midfield hi
Klopp-a'n fit tawk loh avangin Fabinho chu bench-ah a dah a ṭul a, Hendo, Harvey Elliott leh kum 36 mi ni tawh James Milner ten bul an ṭan a ṭul a, United player tlan chak karah Reds midfield an che thei lo a ni ber.

Minute 59-naa Fabinho tlan luh hnuah Liverpool midfield-in awmzia a nei ve ṭan chauh a, Reds goal khung khawl Salah-a'n ball ṭha a hmu lo lutukte chu khawngaihthlak tak a ni.

City nena inel tak tak turin Liverpool squad a chhah tawk lo tih a lang a, hliam an tam lutuk hi manganna tham a ni bawk - chutihrual chuan an boss hi Klopp a ni miau a, Liverpool hi tlu hlen tur khawp chuan an ṭha hret.

Old Trafford-a inkhela a tawpa lang chiang ber erawh, chak duhna leh thinlung paukhauh nena an khelh chuan, Premier League-a eng team pawh hneh turin United an ṭha tawk a, Casemiro an neih tawh bawk avangin season tluana 'nuih' an ni tawh bik lo ang.

Tactical chungchang pawh a sawi theih a, mahse, a pawimawh ber erawh rilru a ni. Player-te an inman a, theihtawp an chhuah bawk. Kan game hmasate nen inang lo taka khelh a, rilru puthmang danglam ka duh a, chu ngei chu ka naute khan khelmualah an rawn luhpui a ni.

Hei hi a bul ṭanna chauh a ni a, hei aia hahdam zawk leh hlauhawm takin kan khel thei tih ka hria. Team anga khelh a, chak duhna thinlung neih a ṭul a, chu chu vawiinah kan hmu a ni. Maguire leh Ronaldo chungchang sawi a ṭulin ka hre lo - player ṭha tak an ni a, kan hmabak match zelah an la inkhel ang. Kan player neihte hi an ṭha tawk tih ka pawm thlap a, chutihrual chuan transfer a la tawp lo - squad chhah ṭha kan mamawh a, chutihrual chuan quality thlir tel a ngai. - Erik ten Hag, Manchester United boss


Mipui leh United fans beisei ang ngeiin inkhel ṭantir lam kha a ni a, keini aiin an kawlhrawng hret a, keini aiin an duhdan angin an khel thei zawk. Goal an rawn khung a, veng thei tur kan nih laiin kan ti ṭha tawk lo - mahse, goal luh chhan chu hetiang zel hi a ni!

First half tawp lamah kan tibuai viau a, chance pawh kan nei. Second half-ah chhunzawm kan duh lai takin goal kan chhuah leh a, hmanhmawh taka nawr kha a ngai tawh a ni. Goal kan khung a, kan phu takzet - nawr chhunzawm kan mamawh a, a tih pawh kan ti ngei. Mahse, a tawpah chuan a ṭha tawk lo a ni.

Sawi tur ka nei tam lo, kan tlawm a, nidangah chuan khatiang ang thoa khel khan kan chak thei ang. Inrinniah (vs Bournemouth) game pawimawh tak Anfield-ah kan nei dawn a, theihtawp kan chhuah a ṭul. Liverpool fans zawng zawngin min beisei angin khelh kan tum a, kan nunna atan kan bei ang. - Jurgen Klopp, Liverpool manager