US Open khel lo tur Zverev

Alexander Zverev chuan US Open a khel thei dawn lo. Tournament buatsaihtu lam chuan Zverev inhnuhdawh thu hi an puang chiang, world number 2 hi a kerek hliam zai chu a la dam chiang hman lo a ni.

French Open-ah khan Zverev leh Rafael Nadal te an inhmachhawn, German tlangval Zverev-a'n ball vuak let tuma a tlanna lamah a ke a ti na, inkhel chhunzawm thei loin a chawl nghal - Roland Garros hnuah tournament a la hmachhawn leh thei lo.

Kum 25 mi Zverev a tel theih dawn loh avang hian, tualchhung player Miroslav Kozlov chuan main draw a lut nghal ang. Kum 24 mi Kozlov tan Flushing Meadows-a a inlan hmasak berna tur a ni ang.

Zverev chauh a ni lo, tunah chuan Grand Slam vawi 21 champion tawh Novak Djokovic chu dinhmun chiang loin a awm mek. United States hian nikum October thla aṭang khan, ram dang mi an rama lut tur tan Covid-19 laka invenna vaccine lak a ngaih thu a sawi.

Serbian mi Djokovic hi vaccine la duh lo zinga mi a ni. He thil vang hian January thla khan Australian Open pawh a khelh theih loh phah hial. Tun hnaia Masters inelna pawh a khel thei lo a, ranking chhuak tharah chuan paruknaah a tlahniam hial.

US rama hriselna lama thuneitu sang US Centers for Disease Control and Prevention (CDC) chuan an dan hman lai hi an la tidanglam lo. Tun karah dan thar an siam emaw, kalphung an thlak a nih loh chuan Novak tan kawng an hawnsak lo ang.

Tennis season kal laia Grand Slam hnuhnung ber US Open hi August 29 aṭang hian Flushing Meadows, New York khawpuiah khelh a ni dawn.