England club ropui ber ka zawm - Casemiro

Manchester United chuan Thawhṭanni zan khan ennawm hmuhnawm chhuahna ṭhin 'Theatre of Dreams' tih hiala hming lem an pek Old Trafford-ah an player thar Casemiro an tlangzarh. Brazilian midfielder hian inkhel hmuhnawm a thlir zui a, Erik Ten Hag-a hoten United hmelma Liverpool 2-1 in an hneh.

English club hian Real Madrid aṭangin Casemiro hi an lei chhuak a, a man hi pound maktaduai 70 thlenga pung thei niin Brazilian midfielder hian kum li daih contract a ziak. Old Trafford-ah Casemiro hi kar khatah £350,000 a hlawh niin tarlan a ni a, United player zingah Cristiano Ronaldo leh David de Gea te chiah amah aia hlawh tam an awm.

Nomawi chawi duh
Kar liam ta khan Man United leh Real Madrid te hian Casemiro chungchangah inremna an neih thu an puang tawh a, hetih hunlaia result ṭha neih loh avanga indawm kun United ṭantute tan chanchin lawmawm a tling.

Khawvel defensive midfielder ṭha zinga sawi phak Casemiro chuan, "England-a club ropui ber ka zawm. Manchester United hi thil thar thlenpui ka duh a, Premier League nomawi chawi ka duh. Fan-te hmaah ka ti tak tak tih lantir ka duh a, chumi ti thei tur chuan ka thawkrim ang. Kuminah UCL khel dawn lo mah se United hi khawvel club ropui ber zinga mi a ni," tiin nomawi chawi a duh thu a sawi.

Casemiro hi sum um vanga Madrid chhuahsan niin sawi a awm a, hemi chungchang zawhna chhangin Brazilian midfielder chuan, "Hetiang sawitu chuan min hrechiang lo a ni. Pawisa vanga zawm ka ni lo. Sum um ilang chuan kum li liam ta khan Madrid hi ka chhuahsan tawh ang. Premier League hi ka ngaina a, helai hmuna khelh hi ka lo suangtuah ṭhin. Manchester United tana chona thar hmachhawnna theihna hun awm hian min tiphur hle. Manager ropui tak tak ka thawpui tawh a, Erik nen pawh kan inbe tawh. Hma thlir ṭha tak a nei a, thawhdun a châkawm tawh hle," tiin a insawifiah a, chona thar hmachhawn a châk thu a sawi.

Real Madrid-ah Casemiro hi Cristiano Ronaldo leh Raphael Varane te nen hlawhtling takin an khel ho a, khawvel player ropui ber ang hiala mi ṭhenkhatin an sawi Ronaldo hi United chhuahsan tura sawi a ni. Casemiro chuan, "Cristiano hi a cham ngei ka beisei. Player danglam bik a ni a, amah nena khelh dun ka duh a ni," tiin a sawi. United-in Jurgen Klopp-a hote an hneh ṭumah erawh Ronaldo hi bench-ah a awm a, hun tawp dawnah chauh a lut.

A ṭangkai dawn em?
Casemiro nomawi chawi zat hi chhuanpui tham a tling a, Real Madrid tana La Liga, Champions League leh nomawi dang ṭhahnem tak a chawi bakah hian Brazil tan pawh hlawhtlinna ṭhahnem tak a chang tawh. Kum 2009 khan Brazil chu South Amercian Under 17-ah a champion pui a, FIFA U-20 World Cup (2011) leh South American U-20 Championship (2011) ah a champion pui leh bawk. Senior team-ah kum 2019 khan Copa América nomawi a chawi tawh a, hmabak chu FIFA World Cup a ni.

A sulhnu thlirin Casemiro hi khawi team-ah pawh khel tlakah a ngaih theih a, mahse football kalhmang a inang vek kher lo. Liverpool-a hlawhtling Michael Owen leh Arsenal-a hlawhtling Nicolas Anelka te Real Madrid-ah an hlawhchham tawh a, Old Trafford-ah pawh a hun laia Brazilian player hming langsar ni ve phak José Kléberson a hlawhchham chiang hle.

Real-ah Casemiro hi Luka Modric leh Toni Kroos te nen an inkawp a, an ram thlira ball thiam ber tura ngaih Brazilian midfielder hi Modric leh Kroos te kaihza vengtu tia sawi theih a ni. Croatian midfielder Modric hian Casemiro hi, "Khawvela kaihza vengtu ṭha ber," ti hialin a fak.

Mahse maw, United manager Erik ten Hag hi high-pressure philosophy kalpuitu a ni a, chumi awmzia chu Dutch manager hian ball an chan lohin a naute chu ball an chan let theih nan na takin pressure a pek tir a, defender-te pawh an tawlh hma ṭhin. Ten Hag hian Ajax a enkawl lai anga United hi a kaihruai a nih chuan Casemiro hi a rang tawk lo thei tlat.

Ten Hag-a'n engtin nge Casemiro hi a chhawr ang tih hriat a châkawm takzet. United hian 4-2-3-1 formation hmangin Casemiro hi Fred emaw Scott McTominay emaw nen inkawp se, thahrui chu an ngah ngei ang a, inkhel thunun erawh a har ang. Chutihrualin Casemiro hi Christian Eriksen nen inkawpin a hmaah Bruno Fernandes awm se, inkhel thununna chance a sang ang a, mah se thahrui an tlachham thei thung.

Casemiro tan Ten Hag hnuaia indinthar mek United tana khelh ṭhat nghal hi thil awlsam a ni dawn lo tih chu a chiang a, amaherawhchu Brazilian midfielder hi hun harsa paltlang tawh rilru paukhauh a nih bakah hruaitu ṭha a ni. Liverpool an hneh zawhah Ten Hag-a'n khelmual chhunga hruaitu ṭha neih belh a mamawh thu a sawi a, Manchester United-in Southampton leh Leicester City an hmachhawn hunah chuan a inlan ngei ang.