Subroto Cup a awm leh dawn ta

Mizo footballer ṭhahnem takin India hriat an hlawh ṭanna Subroto Cup chu kuminah khelh a ni dawn. Subroto Mukherjee Sports Education Society (SMSES) leh Indian Air Force te buatsaih inelna hi hripui leng vanga kum hnih chhung an khelh thei loh hnuah an khel thei leh dawn tihna a ni.

Tournament hi New Delhi khawpuiah khelh a ni dawn. September 6-15 chhung hian Sub-Junior Boys (Under 14) khelh a ni ang a, kum 17 hnuai lam hmeichhe tan inelna hi neih zui a ni ang. Junior Boys (Under 17) erawh October thlatir lama khelh tur a ni thung.

Lawmman atan Rs 23 lakh sem ral a ni dawn a, team lawmman bakah mimal lawmman hrang hrang sem a ni ang. Mipa leh hmeichhe player ṭha bik tan scholarship a awm dawn bawk. Junior Boys tan Rs 25,000 a ni ang a, Junior Girls leh Sub-Junior Boys tan Rs 15,000 a ni thung ang.

Bhaichung Bhutia lar chhuahna Subroto Cup-ah hian mikhual langsar tak tak an awm ṭhin. Tun hmain Pele (2015) bakah Rivaldo leh Roberto Carlos (2016) te pawhin hun an lo hmanpui tawh a ni.

India rama school hrang hrang inelnaah hian, ruahman dan chuan school 85 an inlan thei ang.