Chelsea-in Gordon an ngam huai

Leeds United laka 3-0 a tlawm hlim Chelsea-in nipui transfer bazar-ah duhtawk an tum lo a, Everton aṭanga attacking midfielder Anthony Gordon lalut turin pound maktaduai 60 an theh chhuak dawn niin an sawi!

Chelsea hian Gordon lakluh duhin Everton hi vawi hnih ngawt an lo dawr hlawhchham tawh a, £40mtd-a an dawrna hmasa ber hnar a nih hnuah £45mtd-in Merseyside club hi an dawr leh a, mahse, hei pawh hnarsak an nih hnuah £60mtd nen an rim leh dawn.

Kum 21 mi Gordon hian Everton tan Premier League match 51 khel tawhin, goal li chiah a la khung a, assist vawi thum a nei tel - a tawnhriat thlirin Chelsea ngamna zat hi Blues fans zingah pawh uchuak ti tawk an awm ngeiin a rinawm. Gordon hian June 2025 thleng Everton-ah contract a nei a, Frank Lampard-a team hian contract thar an la zawrh ve reng nia sawi a ni.

Tottenham Hotspur chuan Richarlison an lakluh dawn khan Everton hi Gordon chungchangah an dawr tel a, mahse, player pahnih man atan £80mtd chiah an phal avangin an inrem lo. Newcastle United pawhin Everton an bia a, official takin an ngamna zat an thehlut lo thung.

Chelsea hian neitu thar hnuaiah sum an ren lo hle - nipui transfer-ah £170mtd chuang an hmang tawh a, Marc Cucurella (£63mtd), Raheem Sterling (£47.5mtd), Kalidou Koulibaly (£34mtd), Carney Chukwuemeka (£20mtd), Cesare Casadei (£13mtd) leh Gabriel Slonina (£8.1mtd) te an lalut tawh.

London club hian Porto winger Pepe (£59.1mtd) leh Barcelona forward Pierre-Emerick Aubameyang (£15mtd - £25mtd) pawh an la ngaihven renga sawi a ni a, inthuam ṭhat an tum hle.

Hetihlai hian Chelsea hian left back Emerson Palmieri chu West Ham-a kaltir turin David Moyes-a team hi inremna an neihpui tawh a, £13mtd-in an hralh dawn - he thuziak i chhiar meuh chuan Italian defender hian Hammers hi a zawm tawh hial ang.