Silly Point ; 2022/23 i ṭan ang aw!
Fur chawhnu lam kan lo thleng leh ta der a, India cricket calendar bikah pawh off season zo thawkhatin, pre season lamah rilru a insangmar leh ṭan ta bawk. Domestic cricket lam team hrang hrangte pawh an inbuatsaih leh chur chur tawh a ni.
Mizoram team-ah kum kha leh chen kha ka lo khawsa ve ṭhin. Tunah erawh ka teammate hluite leh ka naute ho pawh, kan tel lova an ṭhat tawh zawk miau avangin khelmual chhung lama ka hun pawh ka lo hmang zo ve ta.
Tunah erawh a kheltu ni loin a entu ka ni tawh zawk a, a zirchiangtu pawh kan ti thei ang. Delhi tlanga an pre-season camp vel chetla han hmuh vel pawhin season thar kan hmachhawn turah hian beiseina sang tak min pe a ni.
International team lam erawh chawlh tak tak a awm lo. Tun hnaiah West Indies leh Zimbabwe te an han tlawh kual a, kan nghahfak Asia Cup leh Khuangchawi thlaa Australia rama an nghah tur ICC T20 World Cup a la awm bawk. Sahmulphah thla aṭanga ṭan tur FIFA World Cup awm chhunzawm bawk tur nen, infiamna khawvel kutpuiin kumin kum tawp lam chu kan khar dawn ni awm tak a ni.
Gulf lamah mit i len ang
Tun hnai kum hnih thum chho chu, cricket leh UAE hi a pawh hran tak tak theih loh a, IPL hnehsawh tak taka an thlen avangin tuna Asia Cup nghah nan an hmang pawh hi a ngaihṭhat thlak ngei mai.
Thailan tawh angin, kum tawp lamah tui let hnua FIFA World Cup thlasika an khelh hmasak ber tur, Qatar ramah nghah a lo ni bawk nen, khawvel mit fukna hi a middle East deuh ruih reng mai dawn hrih a nih hi maw.
Indo Pak
August 27, Inrinni aṭangin khelh ṭan a ni ang a, Pathianni a lo inher chhuah hunah Sunday Blockbuster tia chhal theih India leh Pakistan-in min lo hmuak nghal.
Asian Cup bikah hian ṭum 15 an lo inhmachhawn tawhah Hamara Desh hian vawi riat hnehna lo chang tawhin, ṭum 5 erawh an lo tlawm tawh thung.
Mahse, India Pakistan intum hun a lo inherchhuah reng reng hi chuan, history hi sirah hnawlin, thapui chhuaha, beiseina tha thar nen a inkhelate leh a thlirtu mipui te pawh hian harhtharna kan chang fo zel ṭhin a nih kha maw!
Kohli - Azam
Tun kum 10 chhunga cricket khawvela batsman famkim hming thlan tur ni ta se, Virat Kohli leh ṭhenawm Babar Azam a te hming hi vote hmu sang pahnih an nih pawhin thil awm lo a ni miah lo.
Chutihrual chuan chesual ve thei lo emaw tih mai tur Virat Kohli a form hi tun hnai kum hnih khat chho hian a tlahniam deuh a, hei pawh ama standard sang tak in set tawh aṭanga kan teh loh theih loh vang a ni.
Professional Infiammi tena an patlang ngei ngei - hun thim, khelh ṭhat hleihtheihloh lai, engmah a kal tluan theih loh lai ang kha Virat Kohli a meuh pawhin a tawntlang ve a lo ngai reng a. A footwork a fuh lo, a lu a che, a kut dinglam a hmang nasa etc tih vel thai lan ve chiam ka tum lo.
Sap ṭawng takin form hi chu 'temporary' a nia, class erawh 'permanent' an tih hi Virat Kohli te ang tan chuan inkhel vawi khat lekah an thlendik tir leh mai ṭhin.
Chutirual chuan tui chunga kea kal thei emaw tih tur khawpa khawvel bowler tena vawm hlum dan an hriat loh, ṭhenawm Pakistan kaptan Babar Azam han sapatal vel hmu châk hian, India fans tamtak pawh hi an kat nuk ta awm e.
Midang
Jasprit Bumrah leh T20 specialist Harshal Patel te awm lo tur hian, India camp lamah hlauhthawnna engmaw chen chu a siam ngei ang. Bhuvaneshwar Kumar-a'n val upa chan a chan ngei a ngai ang a, spin department lamah Yuzvendra Chahal, Ravichandran Ashwin leh Ravindra Jadeja ten ni ṭha an hman a ngai bawk ang.
A ball vawm lamah tak hian Pakistan lam hi chhetein an lawr zawk kan ti thei ang a, mahse eng target pawh um leh siam turin Rohit Sharma leh a hote hi thlamuanpui tham an ni ve hrim hrim.
Engpawh nise, cricket season khuh hawn nan, UAE lamah mit i len ṭan ila, Asia Cup-in bul in ṭan dawn ang aw!
Asia Cup Fixtures
Group A : India, Pakistan, Qualifier*
Group B : Afghanistan, Bangladesh, Sri Lanka
August 27, Inrinni
Sri Lanka 7:30 PM Afghanistan
August 28, Pathianni
India 7:30 PM Pakistan
August 30, Thawhlehni
Bangladesh 7:30 PM Afghanistan
August 31, Nilaini
India 7:30 PM Qualifier*
Qualifier: United Arab Emirates, Hong Kong, Kuwait leh Singapore te zinga che ṭha berin Asia Cup hi an khel dawn. Zanin hian qualifier hi an khel zo ang a, Singapore-in beisei an nei tawh lo.
- K. Vanlalruata