Roma chak niah Juve chak zo lo

Jose Mourinho enkawl AS Roma chuan Serie A match hnih an khelhah hnehna an chang ve ve. Thawhṭanni zan inkhel dangah champion tura rinkai Juventus erawhin goal an khung lo, an mikhualna ramah Sampdoria nen 0-0 in an inhnehtawk.

Stadio Olimpico-a inkhelah AS Roma tan Chris Smalling chuan goal awmchhun a khung a, an mikhual Cremonese chu 1-0 in an hneh. English defender hian a goal khung chu a teammate, ke ruh tliak avanga rei tak chawl tur Georginio Wijnaldum tan a hlan.

Hna kan thawk ṭha
Tammy Abraham, Paulo Dybala leh Nicolo Zaniolo te intlar mah se goal an khung mai thei lo a, second half-ah erawh Lorenzo Pellegrini-a corner pet chu Smalling-a'n goal awmchhun atan a tauh lut a, point thum hmuh nan a tawk.

Kai thar Cremonese an khel thei viau, striker Cyriel Dessers-a'n hun remchang nei mah se crossbar a tih per hlauh. Europa Conference League champion hian tun season Serie A-ah goal an la chhuah lo - Portuguese manager enkawl an ni tih a hriat.

Roma manager Mourinho chuan, "Cremonese khan an khel ṭha hle, a nihna tak sawi chuan a tir lam minute 25-na thleng kha chuan goal khung theihna remchang pawh kan insiam thei miah lo. Amaherawhchu, point thum hmu tura kan mamawh ang kan ti thei.

"Ka naute rilru puthmang hi ka duh zawng tak mai hi a ni a, season hmasa chawhnu lam aṭang khan he rilru hi ka pu tawh. Inkhel zawng zawngah hian chak kan tum ngam tur a ni a, kan tum zel bawk ang," tiin a sawi a, league nomawi chuh phak ngei a tum.

Juve an chelh
Juventus hian season hmasa lama an mu tan kha an la chingfel lo a ni mai thei, an hneh tura ngaih Sampdoria lakah goal an khung thei lo. Mual neitu Sampdoria lamin Mehdi Leris hmangin goal ban an tih per a, chance dang insiam lo mah se an goal an venghim thung.

Massimiliano Allegri nauten inkhel an thunun, winger Juan Cuardado-a'n striker Dusan Vlahovic a siamsak mai loh avangin an hun ṭha hmasa an hlah a, midfielder Adrien Rabiot chuan Vlahovic siamsak khung mah se offside vanga hnawlsak a ni.

Old Lady manager Allegri chuan, "Match hnih kan khelh tawhah goal kan chhuah lo. Mahse, Sampdoria lakah kan khung thei bik lo a, hmasawn kan la ngai ve bawk tihna a ni. Chutih rualin hetiang result hi chu football hian a keng tel ve bawk," a ti.

Juventus hian tun kar tawpah point ruk hmu tawh AS Roma an mikhual zui nghal dawn, Italian champion tum pahnih inkhel hi a hmuhnawm dawn. Sampdoria erawh Salernitana khelmualah an lenglut thung ang.