Sania Mirza a inhnukdawk

Indian tennis star Sania Mirza chuan US Open a khel dawn lo, hard court inelna lian inbuatsaih nana an hman National Bank Open-ah Mirza hi a kiu a hliam a, hei vang hian New York khawpuiah a inkhel thei dawn lo a ni.

Kum 35 mi Mirza hian tun season tawp rualin tennis a chawlhsan tur thu a lo sawi tawh. Hetiang a nih takah chuan Grand Slam khelh tur a nei dawn tawh lo tihna a ni a, inelna dang Masters erawh khelh tur a la nei ang.

Hmeichhe doubles huangah world number 1 hlui Mirza chuan, "Kar hnih liamta khan Canada ramah inelna kan hmachhawn, khami ṭuma ka hliam kha tun hnaiah endik nawn leh a ni a, vanduai thlak takin ka chawlh rih ngai dawn.

"Ka chawlh chen tur tak erawh hriat a la ni lo. US Open ka khel thei lo tur hi thil hrehawm tak chu a ni, ka chawlh hun tura ka sawi lawk tawh pawh a nghawng mai thei," tiin a sawi a, inelna dang a la hmachhawn leh thut mai thei.