UCL Playoff - Nistelrooy vs Bronckhorst

UEFA Champions League khel tur zawnna playoff chu zanin hian khelh zawh a ni dawn a, zanin dar 12:30-a inkhel tur PSV leh Rangers hi an manager-te avangin en châkawm a tling. PSV hi Champions League goal khung theih vanga sulhnu nei ṭha Ruud van Nistelrooy enkawl a ni a, Rangers hi Dutch coach tho niin Barcelona leh Arsenal tana khel tawh Giovanni van Bronckhorst enkawl a ni thung.

First leg kha Ibrox Stadium-ah khelh a ni a, mikhual team PSV-in Ibrahim Sangare hmanga khung hmasain Rangers tan Antonio Colak-a'n first half-ah vek a sut. Scottish club hian minute 70-naah Tom Lawrence hmangin hma an hruai a, minute 78-naha mikhaul team-in Armando Obispo hmangin an sut.

Inkhel hmasa zawkah chak zawk an awm loh avangin second leg a hmuhnawm sawt dawn. Premier League thlir ṭhin Champions League khelh inchuh boruak sanzia an hria a, chuvangin PSV leh Rangers tan UCL playoff hi a pawimawh dawn tih a hriatthiam theih.

Rangers-in Champions League group stage chin an khelh hnuhnun ber chu 2010 daih tawh kha a ni a, Steven Gerrard hnuaiah Europe inelna sang ber an khel lo. Europa League final hial thlenpuitu manager Van Bronckhorst tan UCL khelh theihna kawng a inhawng zau hle.

PSV erawhin kum 2018 khan UCL group stage an khel a, chutihrualin tun hnaiah playoff-ah an che sual fo a, Europe inelna sang bera tel hi a la awlsam dawn lo.

Playoff khelh ngai loin club 26-in group stage an lut tawh a, chung zinga seeded team pariatte chu UCL champion Real Madrid leh Europa champion Eintracht Frankfurt bakah Manchester City, AC Milan, Bayern Munich, Paris Saint-Germain, Porto leh Ajax te an ni.

Heng club paruk bakah hian team 18 dang Liverpool, Chelsea, Barcelona, Juventus, Atletico de Madrid, Sevilla, RB Leipzig, Tottenham Hotspur, Borussia Dortmund, Salzburg, Shakhtar Donetsk, Inter Milan, Napoli, Sporting CP, Bayer Leverkusen, Marseille, Club Brugge leh Celtic te chu UCL khel turin an tling tawh bawk.