India-in Zimbabwe an hneh awlsam

India chuan Asia Cup an khelh hmaa an match hnuhnung berah Zimbabwe an tlawh a, mualneitu chungah zahngaihna nei loin 3-0 in series an la. Match hnuhnung ber hi August 22, Thawhṭanni khan khelh a ni a, Men in Blue hi 13 runs-in an chak.

India-in bat hmasain Shubman Gill-a'n 130 runs a siam hmangin over 50-ah 289/8 runs an siam. Kum 22 mi Gill hian match hmasa berah thi loin 82 runs a siam a, match hnihnaah 33 runs siam bawkin player of the series-ah an thlang.

KL Rahul captain-na hnuaia khel India-in target ṭha tak an chhawp avangin an chak dawn tih a hriat theih a, chutihrualin Zimbabwe tan Sikandar Raza chu sawizui tlak khawpin a che ṭha. Raza hian 115 runs a siam a, 49.3 overs-ah 276 an siam theih phah a ni.

India hi August 28, Pathianni zan dar 7:30-ah Pakistan nen Asia Cup group stage-ah an inhmachhawn ang. Thawhṭanni khan ICC ODI ranking thar tihchhuah a ni a, India hi pathumnaah awmin an khingpui tur Pakistan hi palina an ni.

ICC ranking-a pakhatna hi New Zealand an ni a, pahnihnaah England an awm. Asia Cup-ah a sang pahnih hi an tel dawn loh avangin Men in Blue hi champion tura rinkai an ni thei ang.