PSG kutah Ligue 1 nomawi

French football chu tun season atan khar fel a ni ta, inelna sang ber Ligue 1-ah Paris St-Germain chu champion a puan an ni. PSG hi tun hnaiah a zawnin season thum pakhatna an ni a, a pumpuiah vawi kua an champion tling ta chiah.

Ligue 1 aṭang hian Toulouse leh Amiens te an tla, Ligue 2 aṭangin champion atana puan Lorinet leh Lens te an kaisang dawn a ni. European football khel tur ti chiang tur erawhin May 25 thleng hun an la neih thu an sawi.

Hri leng vang hian kar hmasa khan Dutch FA chuan season an tihtawp thu an lo puang tawh bawk. Eredivisie-ah erawh champion leh thlahniam an awm lo, Ajax chuan AZ Alkmaar lakah goal difference hmang chauhin hman an hruai a, nomawi chawi zawk an awm lo.

Covid-19 vangin March 13 aṭang khan Ligue 1 hi chawlh lailawk a ni tawh. Beiseina sang tak nen league hi khelh chhunzawm theih an beisei; hun rei tak chhung chu June 17 vel aṭanga khelh theih an inring.

Mahse, France prime minister Edouard Philippe-a'n an ramah September thla thleng chu infiamna lian neih khap a nih thu a puang a, football thuneitu sang Ligue de Football Professional (LFP) tan duhthlan tur dang a awm tawh lo.

Ningani zan khan LFP hi an ṭhukhawm a, league match an khelh tawh zat aṭanga chhutin, chawh ruala match khata point hmu hnem ber PSG chu champion atan an puang, a tlahniam leh kaisang tur thlengin an siam fel nghal.

LFP duhthlan theih zingah–club tin point hmuh sa chu a pangngai anga kaltlang pui theih tih leh, vawi khat ṭheuh an inhmachhawn chhuah china an dinhmun en theih chu a tel a, mahse heng pahnih ai hian 'Points per Game' en an tlang ta zawk.

Match khat aṭanga an point hmuh chawhrual a intluk a nih chuan, team intluk daidan turin an pahnih intawn tawhna (head to head) en a ni. PSG hian point pangngaiah pawh Marseille aiin point12 ngawtin an sang fal–champion nih hi an phu viau.

PSG chairman leh CEO ni bawk Nasser Al-Khelaifi chuan nomawi an chawi chu hri dona kawnga thawktute tan an hlan thu a sawi. Al-Khelaifi chuan, "Mahni nunna thapa hri leng dotute kan zah, ram leh hnam tana an inpumpekna kan hre reng.

"Sorkar thutlukna kha kan hre thiam a, kan zah em em bawk a ni. An sawi fo tawh angin hriselna chu a pawimawh hmasa ber niin, mitinin kan ngaih pawimawh ber tur pawh a ni reng a ni," tiin a sawi.

Qatari sumdawng hausa chuan sawi zawmin, "Hethiang hun harsa tak karah hian kan nomawi hian min ṭantu mipui hlimna a thlen ngei ka beisei. Hma lam pana Paris St-Germain a kal zel theih nana min thlawptu an ni a, an chungah ka lawm takzet," tiin fans a ngaihpawimawh thu a sawi bawk.

French sorkar thu chhuak ang chuan PSG hian September thla hma chuan Le Parc des Princes-ah European football pawh an khel thei dawn chuang lo. Champions League quarterfinal an lut tawh a, inelna an khel chhunzawm a nih chuan inlan theih dan an ngaihtuah ang.

Nasser Al-Khelaifi hian, "Ram pawnah kan home match khelh ngai pawh ni se tih dan kan ngaihtuah ang," tiin a lo sawi tawh. Europe-a hlawhtlin an duhna hian kawng dang a daptir ngei a rinawm.

Inkharkhip hma an match hnuhnung berah Lyon (40 points) an chak lo, an elpui Nice (41) leh Reims (41) ten point an hmuh belh si avangin an kalsan. Pangana ni ṭhin kha pasarihnaah an tla thla, league khelh chhunzawm theih a nih tak si loh avangin hniam ang reng takah season an khar phah.

European football khel lo tur anga lang Lyon chuan an dikna chanvo hmu let turin an beih tur thu sawiin, "Sum tam tak kan senna leh thawhrimna hmawr bawk nan chuan hetiang hi ni lo se kan duh," tiin an sawi.

LFP chief exicutive Didier Quillot chuan, "Khinletna chu a awm mai thei, mahse kan dinhmun leh thutlukna a nghet tawk," a ti. Quillot hian European football khel tur tihfel nan chuan UEFA-in hun a pek angin May 25 thleng hun an neih thu a sawi bawk.

Hripui lengin football khawvel a tibuai mek a, Dutch League leh Ligue 1 a tawp ta. Bundesliga leh Serie A ten khelh chhunzawm tumin training an nei tawh; Premier League club ṭhenkhat pawhin training zangkhai zawk an nei mahse an khelh chhunzawm dawn ngei em tih erawh chiang a la awm lo.