Vawiinah Lalbiakliana Memorial Super Cup Final ; Chhinga Veng Vs Chanmari West

Cheng nuai hnih inchuhna Lalbiakliana Memorial Super Cup final chu vawiin tlai dar 3:00 hian Lammualah khelh a ni dawn a, Aizawl veng lian pahnih Chhinga Veng leh Chanmari West ten nomawi an inchuh ang.

West Warrior hian semifinal-ah inpuah­chahna nei ṭha ber Mizoram Police an hneh a, transfer laia thawm nei lian ber Chhingcows lakah fiahna hautak zawk an hmachhawn dawn.

Inkhel en man hi Rs 30 a ni ang a, school uniform ha tan inkhel en man a awm dawn lo.

Lal thar!
MFA Super Cup hi vawi li khelh a ni tawh a, inelna ṭan tirh hmasa pathumah hian MPL champion leh knockout inelna (MFA Cup/I Day Football) champion-te an inhmachhawn ṭhin. Hetih hunlai hian Chanmari FC vawi hnih an champion a, tun ṭuma Chhinga Veng coach Lalsangzuala Hmar kaihhruaina hnuaiah Bethlehem Vengthlang an champion tawh bawk.

Nikum aṭang khan inelna kalphung hi thlak a ni a, MFA leh District FA hnuaia register club tawh phawt chu tel an phalsak. I League club Aizawl FC chu kalphung thlak hnua champion hmasa ber an ni.

Vawiina final khel tur Chhinga Veng leh Chanmari West te hian MFA Super Cup final an la khel lo a, champion thar an awm dawn tihna a ni.

Rinkai zawk
Chhinga Veng coach Lalsangzuala Hmar hian BVT a champion pui tawh bak­ah season liam ta khan Chanmari FC chu final a thlen pui a, sulhnu ṭha tak a nei a. Chhingcows-in player an neih ṭhat bawk avangin champion tura rinkai pawh an ni.

Nikuma Santosh Trophy hruaitu coach Sanga chuan, "Venghlui FC nena kan goal chhuah dan kha nikum final-a kan goal chhuah dan nen a inang viau a, inzirna ṭha tak a ni. Hmun hlauhawmna lai leh rilru fim putna hun turah concentration kan hloh leh zauh ṭhin a, final-a hnehna chan kan duh a nih chuan kan siam ṭhat ngei a ngai dawn a, insiamṭhat pawh kan tum ang," tiin Vanglaini a hrilh.

Inelna ṭan hmaa champion tura rinkai Chhingcows hi team ṭha ni mah se awlsam takin final an thleng lo. Match hmasa pahniha awlsam taka an chak hnuah Chawnpui FC lakah 1-2 in an hnufual a, first division club player pakhat hnawhchhuah a nih hnuah erawh 14-2 in an chak.

Quarterfinal-ah Chhinga Veng-in MPL club Bethlehem Vengthlang FC goal khatin an hneh hram a, semifinal-ah Venghlui FC laka goal hnih an chhuah hnuah 3-2 in an tho leh thei hram. An khelh tawhna aṭanga tehin Chhingcows hi chak chiang anga dah theih an ni lo.

Chutihrualin Chhinga Veng hian goal 43 an khung tawh a, position tinah Mizo player ṭha an kawl a, an mamawh chu an veng mipui aṭanga ṭawiawmna ṭha a ni.

Chhinga Veng coach Sanga chuan, "Team tlo tak kan hmachhawn dawn a, a awlsam lo ang. Kan player-te rilru put hmang a dik a, supporter ṭha tak kan nei a, kan champion theih mai chu ka ring," tiin a ringtawk hle.

Dark horse West Warrior
Transfer laia che tlai Chanmari West-in coach tawnhriat nei ṭha HC Zarzoliana an neih zar an zo a, final kalkawngah MPL club pahnih Dinthar FC leh Mizoram Police FC an hneh thei a, champion theihna hun ṭha bawhpelh an tum lo ang.

West Warrior coach Zara chuan, "Chhinga Vengin tualchhung player an duh ang an khawm thei a, an ṭha khawp mai. Amaherawhchu, football-ah chuan chak sa a awm lo a, kan huphurh lo. Champion ngei tumin kan bei ang," tiin Vanglaini a hrilh.

Chanmari West hian hrem vangin defender Calvin Zosiamliana an chhawr thei dawn lo mah se player dang zawng chhawr theih an ni.

Team captain Lalnunmawia'n goal kua a khung tawh a, Mawitea hi a nau Vanlalthlamuana leh Lalremruata ten sir lam aṭangin an nawr pui dawn a, midfielder ṭha Jacob Lalrawngbawla leh Lalromawia ten an thlawp dawn bawk. West Warrior lakah Police an tlabuai tawh a, Chhinga Veng hi talbuai leh thei an ni.

Final a nih tawh avangin goal venhim a pawimawh dawn. Tun inelnaah hian goal 295 a lut tawh a, match tinah goal 4.84 lut ang a ni. Hei vang tak hian Chanmari West tlarhnungah Ronald Zothanzama a pawimawh dawn a, penatly an thleng a nih chuan keeper Malsawma chu an innghahna tur a ni ang.

Mipui vs Mipui
Chanmari West fans an ṭha ṭhin a, tun hnaiah an tlahniam deuh. Semifinal-ah erawh West Warrior ṭantu an tam tih Police an hneh chiaha thawm rin danah a hriat theih a, final-ah erawh an ṭhut khawm a pawimawh ang.

Chhinga Veng erawh awmze nei takin an au rual leh ngeiin a rinawm a, MFA Super Cup bika supporter nei ṭha ber an la ni.

Final Kalkawng
CHHINGA VENG
Zarkawt FC 0 - 9 Chhinga Veng FC
CHH : Malsawmfela 6' (P), 58'; Ramfangzauva 16'; Lalrammuanpuia 32', 41'; Laldampuia 65', 66'; MS Dawngliana 79'; Lalchhuanpuia 87'
Zo Dreams FC 0 - 14 Chhinga Veng FC
CHH : Lalchhuanpuia 18', 77'; Malsawmfela 29', 42', 50'; Lalrinchhana Tochhawng 31', 54'; MS Dawngliana 48', 87'; R. Lalawmpuia 58; Laldampuia 61'; Zosangliana Sailo 73'; Shalom Lala 74'; Lalrammuanpuia 89'
Chhinga Veng FC 14 - 2 Chawnpui FC
CVFC : R. Malsawmtluanga 5', 66'; R. Laldinliana 41'; Laldampuia 45+2 ',61' ,63', 68'; Laldingngheta 51', 86'; MS Dawngliana 70', 81'; K. Lalthlahlova 75; Malsawmfela 89', 90'
CPFC: Lalthansanga 14'; Zarzokima 26'
Chhinga Veng FC 1 - 0 Bethlehem Vengthlang FC
CVFC : K. Lalthlahlova (Patea) 37'
Chhinga Veng 3 - 2 Venghlui FC
CVFC : Malsawmfela 43'(P); H. Lalrohlupuia 60' (OG); MS Dawngliana 62'
VFC : Vanrammawia Ngente 6'; K. Lalthlahlova 14' (OG)
CHANMARI WEST
SYS Academy, Lunglei 1 - 3 Chanmari West FC
SYS : Lalrintluanga 65'
CHA : Lalnunmawia 11', 90+2'; Jacob Lalrawngbawla 74'
Chanmari West FC 3 - 0 Kanan FC
CHA : Lalnunmawia 20', 90+2'; Jacob Lalrawngbawla 39'
Zauva Memorial FC 0 - 15 Chanmari West FC
CWFC : Vanlalthlamuana 9'; Lalnunmawia 39', 40', 50', 77', 80'; Lalromawia 42'; Jh Lallawmkima 55', 66'; C. Lalremruata 60', 72', 85'; R Lathanmawia 71', 73', 75'
Chanmari West FC 1 - 1 Dinthar FC
Penalty Shootout-ah Chanmari West 5-4 in an chak
CWFC : Tlangthanpuia 63'
DFC : Lalnunpuia 48'
Mizoram Police 1 - 1 Chanmari West FC
Penalty Shootout-ah 6-5 in Chanmari West an chak
MPFC : F. Lalrinpuia 90+1'
CWFC : Lalremruata 24'
LAWMMAN
Champion Rs 2,00,000
Runners up Rs 80,000
Semi Finalists Rs 20,000
* Mizoram Police, Venghlui FC
Quarter Finalists Rs 8,000
* Bethlehem Vengthlang FC, Durtlang Leitan, Aizawl FC Academy, Dinthar FC
Round of 16 Rs 4,500
* Venghnuai, Chawnpui FC, Sailam FC, Ramhlun FC, Ramhlun North FC, Aizawl FC, Zauva Memorial FC, Ramthar Veng FC
Round of 32 Rs 2,500
* Bethany FC (Bawngkawn), Durtlang FC, Zo Dreams FC, FC Armed Veng South, Melriat FC, Lungverh FC, Piler FC, Saikhamakawn, MFA Grassroots, FC Ramthar (Durtlang), FC Khatla, Kolasib Ṭumpui GSA, Hming Hming FC, Kanan FC, Chite Veng GSA, Chaltlang FC
Fair Play Rs 10,000
MIMAL LAWMMAN
Best Goalkeeper Rs 3,000
Best Defender Rs 3,000
Best Midfielder Rs 3,000
Best Forward Rs 3,000
GOAL KHUNG TAMTE
Hming Club Goal
Vanrammawia Ngente Venghlui FC 10
Lalnunmawia Chanmari West FC 9
Malsawmfela Chhinga Veng FC 8
Lalfakzuala Mizoram Police 8
Laldampuia Chhinga Veng FC 7
MS Dawngliana Chhinga Veng FC 6
Lalbiakhlua Mizoram Police 5
K. Roluahpuia Venghlui FC 5