City-a Danilo hnung zui tur Mendy
Manchester City chuan La Liga champion Real Madrid hneh aṭangin defender Danilo chu pound maktaduai 26.5 in an lalut chiang tawh a, Monaco defender Benjamin Mendy chu pound mataduai 52-a lalut turin inremna an siam tawh bawk.
Kum 26 mi Brazil international Danilo hian Etihad Stadium-ah kum nga chhung daih contract a ziak a, United States lamah pre season tour a zawm nghal ang. Danilo hi defender ni mah se midfield-ah pawh a khelhtir theih a, season tharah Pep Guardiola tan player pawimawh a ni thei ang.
Danilo chuan, "Club dang min ngaihventu pawh an awm, mahse Pep Guardiola hnuaia khelh hi ka duh," tiin City a pan chhan chu manager Guardiola a nih thu a sawi. City hian Nilaini hian Los Angeles-ah Real Madrid an hmachhawn dawn a, Danilo hian a club hlui a hmachhawn nghal thei ang.
La Liga club tan Danilo hian season hnih a khelh chhungin inelna hrang hrangah match 55 a inlan a, La Liga pakhat, Champions League pahnih bakah UEFA Super Cup leh FIFA Club World Cup te a chawi pui hman.
Tun nipui trasfer bikah City hi club che na ber pawl an ni mek. England international Kyle Walker (£45m), Portugal midfielder Bernardo Silva (£43m) leh Brazilian goalkeeper Ederson Moraes (£35m) te an lalut tawh a, Danilo (£26.5m) nen an sum hman tawh zat hi pound maktaduai 149.5 a ni der tawh.
Arab sum hmanga siam len City hian an la duhtawk lo cheu. Kum 23 mi Benjamin Mendy chu French Ligue 1 champion Monaco aṭangin an lalut dawn tih a chiang tawh bawk. France left back Mendy man zat turah club pahnihte hi pound maktaduai 52-in an inrem tawh a, tun nipui chhunga City sum hman hian pound maktaduai 200 a pel ngei dawn.