Indian Super League khel tur an chiang ta
India rama league ngaihven hlawh ber, Indian Super League draft chu nimin khan Mumbai khawpuiah neih a ni a, a tirah footballer 200 awm tura ruahman chu draft ṭan a nih hmain 205-ah a pung.
Players 205 aṭangin ISL club 10-ten an duh an thlang a, players 134-in club an neih laiin players 71 ngawtin duhtu an nei lo.
Nimina player hralhchhuah zingah Eugeneson Lyngdoh leh Anas Edathodika chu manto ber an ni a, player pahnih hi nuai 110 ve vea hralhchhuah an ni.
Khawiah nge Eugene?
Atletico de Kolkata tih hming pu ṭhin, Atletico Madrid nen an thawhdunna a tawp tak avanga Amar Tamar Kolkata tih hming pu ta ATK chuan Khasi midfielder Eugene an chang.
Mak ve angreng tak chu instant trade card hman theih a ni chungin Bengaluru FC 'player chuam' ni ṭhin hi South Indian club hian chelh tumna an nei miah lo a, "India rama football club zingah Bengaluru tluka inrelbawlna ṭha an awm lo," tia Vanglaini hnena lo sawi tawhtu midfielder hi Bengaluru lama a pu hlui ATK technical director ni ta Ashley Westwood nen an thawk dun leh dawn tihna a ni.
Jamshedpur an hausa
ISL club thar Jamshedpur FC-ah Anas Edathodika a khel dawn a, Delhi Dynamos-in vaibelchhe khat chuang a phut avanga an chelh ngam loh defender lalut turin Tata Steel enkawl club-in hausa tawkah an inngai.
Jamshedpur hian Indian goalkeeper hmingthang Subrata Paul chu draft-a si ban nghak manto ber ni turin nuai 87-in an lalut a, Mehtab Hossain chu nuai 50-in an lalut bawk.
Sum sen a tlem
Indian Super League club ten season dang aiin draft-ah sum an la seng tlem cheu a, players pawh an base price aia toa lei an tam lo. Hei hi a chhan ber chu ISL lamin club tinin sum an insen theih zat tur an tuk sak vang a ni a, instant trade pawh hman tum ṭhin mah se sum sen hnem a ngaih ṭhin avangin club ten an ngam lo leh ṭhin.
Club tinin player hlawh atana an insen theih zat hi vaibelchhe 18 ṭheuh a ni a, heta ṭang hian vaibelchhe 12.5 chu ram pawn player-a club-in an sen theih zat a ni. Heti zat hi club-in foreign players lakluh nan an hmang a nih chuan club-in Indian player lakluh nan vaibelchhe 5.5 bak an nei lo tihna a ni.
Mizo khelhna tur
Jamshedpur FC
Jerry Mawihmingthanga nuai 15
Sairuatkima nuai 10
Delhi Dynamos
Lallianzuala Chhangte nuai 15
Sena Ralte nuai 27
Kerala Blasters
Lalruatthara nuai 25
Lalṭhakima nuai 10
NorthEast United
Lalrindika Ralte nuai 50
Robert Lalthlamuana nuai 25
Lalrempuia Fanai nuai 8
FC Goa
Nil
Bengaluru FC
Lalthuammawia Ralte nuai 37.5
Zohmingliana Ralte nuai 25
Amar Tamar Kolkata
Nil
Chennaiyin FC
Nil
Mumbai City FC
Lalchhawnkima nuai 20
FC Pune City
Lalchhuanmawia Fanai nuai 45
Isaac Vanmalsawma nuai 15
Note: Chennaiyin FC-in draft-ah Mizo lak belh lo mah se Jeje Lalpekhlua leh Jerry Lalrinzuala an nei sa a, Bengaluru FC-in Malsawmzuala an nei bawk. Bangalore club hian Daniel Lalhlimpuia an chelh bawk a, Serchhip rawlthar Daniel-a hi AFC Cup tan bika chelh niin ISL-a a kal zel dan tur a la chiang lo.