Mizo player to ber Didika
Indian Super League draft neih zawh taka Mizoram player zinga man tam ber chu Lalrindika Ralte a ni - Lunglei tlangval hi NorthEast United chuan nuai 50-in an lalut a, professional football a luhchilh hnuah hmarchhak club tana a khelhna hmasa ber tur a ni.
Season hmasaa ATK tana champion nomawi chawitu Didika chuan, "NorthEast United leh Pune City FC hian draft neih a nih hma aṭang hian min rawn be lawk tawh. A bik takin Highlanders (NE sawina) hian min lakluh an tum em em a, club neitu John Abraham-a'n Mumbai-ah lunch ei puiah min sawm hial. Hetiang taka min duhtu tana khelh chu a châkawm khawp mai," tiin Vanglaini a hrilh.
Player tam takin club hmuh zawh loh hlaua an thin phu a ran laiin Didika erawh a buai lo. "Ka inkhawm san a, inkhawm ban hnuah NE United-in min la tih ka hre ve chiah," a ti! Didika hi East Bengal-a hun rei tak chhung a lo khelhpui tawh Robert Lalthlamuana nen Highlanders-ah hian an khel dun ang.