Mizoram player 14
Indian Super League-a club 10-in player an leichhuah zingah Mizoram player awmzat chu 14 an ni. Lalthuammawia Ralte chu draft-a Mizo player lei hmasak ber a ni a, Champhai keeper hi a club khelhna ngai Bengaluru FC chuan nuai 37.5-in an chang.
Pune City chuan Mizo keeper hi an lo duh ve avangin instant trade chhawr ṭangkai tum mah se Bangalore club nen inremna an nei theih loh avangin a sukna ngaiah Thuama a su dawn. Mizo zinga professional keeper hmasa ber chuan, "ISL a nih tawh avangin chona phurawm tak a ni a, theihtawp ka chhuah ang," tiin Vanglaini a hrilh.
I League-a Aizawl FC champion puitu zingah Lalruatthara chu Kerala Blasters-in nuai 25-in an chang a, Pune City-in Hmunhmelṭha tlangval hi instant trade hmanga lakluh tum mah se Kerala-in tlawm taka chhuah an phal lo. Blasters hian Lalṭhakima chu nuai 10-in an chang bawk.
Aizawl FC champion-na kawnga minute zawng zawng khel kimtu Zohmingliana Ralte chu Bengaluru FC-in nuai 25-in an chang a, an tisual lo tawp ang. Bangalore club hian Thuama leh Zotea bakah an chelh sa Malsawmzuala chu ISL tana player an neih an ni. Mumbai City-ah Mizo awmchhun ni turin Lalchhawnkima chu nuai 20-in a lut.
Delhi Dynamos-in nuai 27 man Sena Ralte leh nuai 15 man Lallianzuala Chhangte te an lalut a, player pahnih tan Delhi club-a an khelh hmasak ber tur a ni. Sena hi NE United chuan instant trade-a lak duh mah se Delhi lamin an kaltir phal bik lo.
NorthEast United hian nuai 50 man Didika, nuai 25 man Robert-a leh nuai riat man Lalrempuia Fanai te an chang a, Pune City-ah nuai 45 man Lalchhuanmawia Fanai leh nuai 15 man Isaac Vanmalsawma an lut. Club thar Jamshedpur FC-ah Jerry Mawihmingthanga (nuai 15) leh Sairuatkima (nuai 10) te an khel bawk ang.