Chona thar hmachhawn tur Chhuantea

Lalchhuanmawia Fanai-in hliam vangin season hman zawh takah a hmel a lan mang lo a, hetichung hian Pune City chuan an hnena khel turin nuai 45-in an lalut. Mizo tlangval hian season thum chhung Bengaluru a chamchilh chhungin ISL club-ah loan-a chhuah nei mah se tun hi a ngheta Bangalore club a chhuah­sanna hmasa ber tur a ni.

Chhuantea chuan, "Bengaluru-ah season thum zet hun ka hman hnuin chhuahsan a ngai dawn ta. Club tharah chona thar hmachhawn tur ka ni a, a lunglenthlak rualin a phurawm khawp mai," tiin Maharashtra club-ah season ṭha tak hman a tum.

Lengpui tlangval chuan season hmasa a inlan loh vanga a hlauhthawn thu sawiin,"Hliam vanga chawl reng ka ni a, zep lohah chuan ka zam ru hle. Mahse, Pathian zarah club thar ka nei ta a, ka lawm takzet a ni," tiin Vanglaini a hrilh.