Sawi hlawh Neymar-a'n goal hnih a khung

Nipui transfer-a boruak nei lian tak Neymar-a'n Inrinni zan khan Barcelona tan goal hnih a khung a, Brazil captain hian Juventus lakah a club hi 2-1 in hnehna a chanpui.

MetLife Stadium-ah International Champions Cup en turin mipui 82,104 zet an pungkhawm a, Catalan club tan hian kum 25 mi Neymar chuan first half-ah goal hnih khungin Juventus goal neih chhun hi second half-a defender Giorgio Chiellini tauh luh a ni thung.

Season hmasa La Liga goal 13 khungtu Neymar hi tun hnaiah Paris St-Germain nen sawi zawm a ni mek. Barca president Josep Maria Bartomeu-a'n an forward hi 'zawrh lai a ni lo' tiin sawi tawh mah se Ligue 1 club hian pound maktaduai 199 zetin an lei ngam! Sum a tam miau chuan eng pawh thleng thei a ni.

Santos aṭanga Barca zawmtu hian nikum October thla khan kum nga daih contract a ziak thar a, a contract neih lai hi kum 2021 October thla thleng daih a ni. Mahse, Barca-ah chuan Lionel Messi a awm miau avangin 'a ṭha ber' a ni phak rih miau lo a, hei vang hian amah ngei pawh a hma hunah a chiang lo nia sawi a tam hle.

Barca coach thar Ernesto Valverde chuan, "Neymar hi kan hnena awm zel turin kan duh, khelmual chhung leh pawna a ṭangkaina hi a sang em em a ni," tiin a player pawimawh chu chelh theih a duh thu a sawi.

PSG lam...

Season thar inbuatsaihna inkhel dangah Premier League pahnihna Tottenham Hotspur chuan PSG 4-2 in an hneh. Spurs tan Christian Eriksen, Eric Dier, Toby Alderweireld leh Harry Kane ten goal an khung a, French club tan Edinson Cavani leh Javier Pastore ten goal an khung ve thung.

Inkhelh banah PSG coach Unai Emery chu Neymar chungchang zawh a ni a, Sevilla manager hlui hian, "Player kan zawng mek, kan squad tichak thei tur kan zawng a ni," tiin a chhang.

Spurs coach Mauricio Pochettino-a'n player langsar thar lalut rih lo mah se an khelh danah a lawm thu a sawi. Poch chuan, "Ka naute khelh danah lawmna tur tam tak ka hmu thei. Friendly match a ni a, chutihrualin team ṭha lakah hnehna chan chu engtik lai pawhin a lawmawm ṭhin," tiin a sawi.