Inkhelh kan la châk lo tlang - Aguero

Manchester City striker Sergio Aguero chun Covid-19 vanga football buaina a thlir a, player tam zawk chuan inkhelh leh lam ai chuan hri leng an hlau zawk rih nia a hriat thu a sawi.

Premier League hi tuna an beisei dan chuan June 8-ah khelh chhunzawm leh an tum, an tum hun anga ṭan tur chuan May 18 velah chuan tun hma lama training pangngai an neih ang kha neih a ngai tawh dawn.

Nizan khan EPL club-te hi inkhelh chhunzawm leh dan tur chungchangah an inhmukhawm a, he thu buatsaih lai hian an thu tlukna kan hre hman lo a ni.

Kum 31 mi Aguero chuan, "Player tam zawk hian hri leng hi an la hlau, an hlauh chhan chu chhungkua leh nupui fanau nei an nih vang a ni. Kei pawh ka bialnu nen kan awm mek a, hri kai ka hlauh avangin hmun dangah ka kal sawn rih lo.

"An sawi dan chuan he hri hian natna lang chhuak vak lo pawhin harsatna a siam hnem thei hle, damlohna tenau nei ringawt mah ila hri ka kai tih ka inhre lo thei. A ruka kan lo kai a nih chuan midang kan kai darh thei reng si a ni," a ti.

English football inelna sang ber hi March 13 aṭang khan an chawl lailawk a, khelh hmabak la awm zawng zawng hi match 92 a ni. Entu awm loa inkhel pawh ni se player bakah coaching staff an awm angaih avangin 

tlem a zawng punkhawm chu a ngai tho.

BBC-in an tarlan dan chuan league hi an khelh chhunzawm a rinawm a, an khelh zawm dawn a nih chuan player tin chu coronavirus an kai em tih chu kar khatah vawi hnih endik an ni ang; an hriselna dinhmun bik chu damdawi lam thiamten nitin an endik bawk ang.