Arsenal ngam loh Batshuayi

Premier League season thar inbuatsaihna inkhelah Chelsea chuan striker Michy Batshuayi goal hnih hmangin an elpui Arsenal chu 3-0 in an sawp.

Inrinni tlai Bird's Nest Stadium, Beijing-a inkhelah Antonio Conte-a'n season hmasa lama a player hmanthiam leh neih ṭhat rual bul a

ṭantir a, striker an hruai ve loh Diego Costa aia lut Belgium international Batshuayi chuan Willian-a goal (40') khung tur a siamsak hnuah goal hnih (42', 49') a khung zui ve bawk - minute 10 chhungin Gun­ners lamah vawi tum a goal.

Blues-in Fulham an hneh hnuah Arsenal an hneh leh a, an London club pui pahnih lakah a zawnin result ṭha an nei. An inkhel hnuhnung zawkah erawh lawm a kim lo, winger Pedro chu keeper David Ospina nen an intihpalh avangin zawn chhuah a ngai a, pre season tour erawh a zawm zel thei ang.

Chelsea manager Conte chuan, "Kan doctor-te duhdan angin Pedro kha damdawi inah hruai a ni a, hliam na tak erawh a ni lem lo. Endik a nih hnuah kan zinna lamah min zawm zel theih tur thu hriat a ni," tiin a sawi.

Premier League champion hian nimin khan China chhuahsanin Singapore an pan. National Stadium, Singapore-ah July 25 hian Bayern Munich an hmachhawn ang a, July 29-ah Inter Milan nen a hmun ngaiah an inkhel zui leh dawn bawk a ni.

Arsene Wenger-a naute erawh Emirates Cup khel turin London lamah an haw dawn thung. An khelmualah Benfica leh Sevilla an hmachhawn ang. FA Cup nomawi kawltu Arsenal hian season thar inbuatsaihna match hnuhnung ber atan August 6 zanah Chelsea nen FA Community Shield an inchuh ang.

Confederation Cup khelh avangin Gunners squad-ah Alexis Sanchez hmel hmuh tur a la awm lo a, press conference neih apiangin Chile international chungchang hi Wenger-a zawhna dawn hnem ber a ni ṭhin, Gunners manager chuan, "Alexis-a chungchanga thu leng vel hi chu thuthar thehdarhtute suangtuahna leng vel mai a ni," tiin thu belhchian dawl tak sawi tur a awm loh thu a sawi.

Player inlate :
Arsenal: Ospina (Martinez); Maitland-Niles (Koscielny), Mertesacker (El­neny) Monreal (Kolasinac); Oxlade-Chamberlain (Willock), Xhaka (Coqulein) Ramsey (Nelson), Bramall (Welbeck); Ozil (Malen), Lacazette (Giroud), Iwobi.
Chelsea : Courtois (Cabellero); Az­pilicueta (Christiansen) Luiz (Kalas), Cahill (Clarke-Slater); Moses (Tomori), Kante (Scott), Fabre­gas (Pasilic) Alonso (Kenedy); Pedro (Boga), Batshuayi (Remy) Willian (Baker).