AFC U23 Qualifier India beiseina a thamral
2018 AFC U-23 Championship qualifier match hnih khelh tur an neihah India chu vawi hnih an tlawm ta - an match hmasa bera Syria an hneh loh hnuah Stephen Constantine-a naute hian a thlengtu Qatar chu 1-0 in an ngam lo leh ta. Khelh tur pakhat chiah an neih tawhah China-a zin turin beiseina an nei tawh lo.
India coach Stephen Constantine-a'n captain Lalruatthara a ring nawn tawh lo a, Hmunhmel-ṭha tlangval hi bench-ah ṭhuttir a ni. Mizo player zingah Jerry Lalrinzuala leh Lallianzuala Chhangte ten inkhel bul an ṭan a, minute 82-naah Daniel Lalhlimpuia tlan luhtir a ni bawk.
Inkhel Chu
India-in an match hmasa berah Syria an ngam loh tawh avangin beiseina chhi nung tur chuan hnehna chan ngei an mamawh tawh a, team ṭha zawk Qatar lakah defensive game khel thei an ni lo. Mahse, India tana chance awm hmasa ber chu Nandha Kumar-a'n minute 24-naah engmah lo maiah a chantir a, Qatar an hlauhawm chhunzawm nghal.
A thlengtu team tan midfielder Ahmed Saadi chu roreltu a ni a, India tlarhnung ten a ke ranna leh ball thiamna an chelh meuh lo. Goalkeeper Vishal Kaith-a'n hnathawh tur a nei zuah zauh a, Pune City keeper hian hmun himah India a dah zel thei - goal lut loin chawlhlawk hman a ni.
Kaith tihsual
Second half ṭan a ni a, minute 54-naah vawi tam India chhanhimtu Vishal Kaith a chesual thung. I League lama Shillong Lajong keeper hian mual sir lam aṭanga ball cross a man hnuah a thlauh palh a, a bula ding Qatar forward Almoez Ali tan goal-a chantir turin harsatna a awm lo.
India-in goal an khung loh chuan beiseina an nei ngam tawh dawn lo tih an inhria a, theihtawp an chhuah chhunzawm. Hetihrual hian mual vei lam sirah Mizo left back Jerry Lalrinzuala chuan hna a nei ve reng bawk. Minute 74-naah Indian rawlthar-te ball inpe kual nalh tak karah Lallianzuala'n hun ṭha nei mah se Qatar tlarhnung a paltlang hman lo. Lunglei rawlthar Lianzuala'n substitute Manvir Singh tan hun ṭha a siamsak chhunzawm a, mahse Punjab striker hian crossbar a pet per. India-in chance dang an neih chhunzawm tawh lo a, 1-0 in an tlawm.
Constantine a vui lo
India-in Qatar hneh loin AFC U23 inelna an khel dawn lo a, hetichung hian India coach Constantine chuan a naute khelh danah a lawm thu a sawi. English coach chuan, "Hnehna an chan avangin Qatar ka lawmpui a, ball chang tam leh inkhel thunun zawk kan nih miau avangin anni pawhin vannei an inti ve khawp ang," tiin chak phu zawkin hnehna an chan loh thu a sawi.
Constantine chuan sawi chhunzawmin, "Ka naute khelh dan ka chhuang takzet a ni. Ṭhenkhat chuan a vawi khat nan ram tana an match hmasa ber an khel a, a tlawm zawka ṭan phu lo mah se kan tihsual vang liau liauin kan chak ta lo. Crossbar kan pet per te kha, zan dang chu ni se a lut hial ang. Mahse, vanduai ṭum hi chu a awm ve a ni," a ti.
Qatar coach a hlim
Qatar coach Felix Sanchez chuan, "Inkhel hautak hmachhawn turin kan inpeih sa a, kan beisei ang ngeiin a hautak hle. Mahse, rim takin kan bei a, harsa takin hnehna kan chang a ni," tiin Indian rawlthar rualte chu hmachhawn an hautak thu a sawi.
Sanchez chuan sawi chhunzawmin, "Hun tawp lam minute 20 kha in thlir chuan India kha team ṭha zawk an ni ngei a, kan ṭang tlang thei kha a lawmawm takzet a ni," a ti a, inkhel pumpuia India chungnung zawk anga an sawi erawh a pawm lo.