India tan Sharad leh Bhati ten medal la
Pian phunga rualbanlote tana buatsaih World Para Athletics Championship-ah India tan Sharad Kumar leh Varun Bhati te chuan silver leh bronze medal an la.
London, England-a neih Long Jump (T42 event) inelnaah Sharad hian a mimala a zuan ṭhat ber ṭum tawngin 1.84m zeta thui a zuang a, pakhatna United States aiawhtu Sam Gwewe a phak lohna chu 0.02m chiah a ni. India tlangval pakhat zawk Bhati chuan 1.77m a thui zuangin pathumna a ni ve bawk.
Sharad leh Bhati ten medal an lak belh takah chuan India-in kumin Para Athletics Championship-ah medal panga a lakna chiah a ni. Sundar Singh Gurjar (Gold), Amit Saroha (Silver), Karamjyoti Dalal (Bronze) ten medal an la tawh bawk a ni.
World Para Athletics Championship hi a vawi sarihna niin nizan khan kharna hun hman a ni a, he thu buatsaih lai hian India dinhmun kimchang kan hre hman lo.