World Championship atan Indian shuttler pariat

Indian badminton hmasawnna chuan hma lam a pan chho mek zel, August 21-27 chhunga neih tur BWF World Championship-ah pawh singles match khel turin mipa leh hmeichhe shuttler pariat a tir thei dawn.

Emirates Arena, Glasgow-a neih tur World Championship-ah hian ram pakhatin mipa leh hmeichhe singles-a player a tirh theih tam ber chu pali zel a ni a, India bakah hian China leh Japan te chuan singles player pariattir thei an ni.

Hmeichhe singles khel turin Olympic medalist pahnih PV Sindhu leh Saina Nehwal te bakah national champion Rituparna Das leh Tanvi Lad te chu an tling chiang tawh.

Mipa lamah tun hnaia shuttler hmuhnawm berte zinga mi Kidambi Srikanth chu India beiseina a ni dawn a, ani bakah hian Sameer Verma, Ajay Jayaram leh Sai Praneeth te chu ram tan an fuh chhuak dawn bawk.

Mipa singles bikah India, China leh Japan bakah Denmark leh Hong Kong te chuan shuttler pali an tir ve thei dawn bawk. China hian champion lai Chen Long, vawi nga champion tawh Lin Dan, Shi Yuqi leh Tian Houwei te an thawhchhuah pui ang.

Denmark tlangval rual - Viktor Axelsen, Jan O Jorgensen leh Hans-Kristian Solberg Vittinghus te hi Asian player ṭha barakhaih thei tur khawp ṭha an ni a. Hong Kong aiawh tur Ng Ka Long, Wong Wing Ki, Hu Yun leh Wei Nan te pawh champion thei tur khawpa ṭha vek an ni.