Thuneitu leh player agent-ten NBA cancel an duh LeBron James-a'n inkhelh a duh thung

National Basketball Association (NBA) executives leh player agent-te'n hriselna thlir chungin 2019-20 season chu coronavirus vanga tihtawp an duh. United States hi Covid-19 tuar nasa ber an ni a, nimin thleng khan natna vei mi 1,095,304 awm tawhin mi 63,871 zetin an thihpui.

NBA star LeBron James erawhin season khelh zawh ngei a duh a, season khelh zawh a la inbeisei fan. Lebron James-a khelhna Los Angeles Lakers hi Western Conference-ah hmahruaitu an ni mek a, playoff khel turin an tling tawh. Season liam ta khan Lakers hian playoff an khel pha lo a, LeBron thlawp turin Anthony Davis an nei tawh a, champion tura rinkai an ni phak.

Covid-19-in NBA a ti buai chho ṭan a, a nghawng pawh a lian, inelna kalpui pawh a harsa dawn. Western conference team-in dollar maktaduai 50 an hloh tawh a, inelna ṭan turin sum lamah harsatna a awm.

Club pakhat hruaitu chuan, "Club thuneitu lamin an zawhna chu inelna ṭan ila, eng nge kan hmuh let ang. Inelna ṭan avanga kan pawisa sen belh tur hi a hmu let thei ang em?," tiin an sum hmanchhuah zat leh an laklet lur a inmil em tih an ngaihtuah thu a sawi.

NBA ṭan leh hun tur hriat a la ni lo a, league thuneitute chuan club hnenah training a theih a nih pawhin May 8 a nih tur thu an hrilh. Inelna ṭan theih turin ngaihtuahna sen a ni a, entu awm loin Las Vegas emaw Bahamas-ah emaw khelh vek ni se tih chu ruahmanna zinga pakhat a ni.

North America-a infiamna zingah NBA hi Covid-19 vanga chawl hmasa ber an ni a, March 11 khan Utah Jazz player pakhat chu coronavirus a vei tih hmuhchhuah a ni a, hemi hnu hian inelna hi khelh a ni tawh lo.

Los Angeles Lakers star LeBron James chuan, "Thuneitu leh agent ṭhenkhatin season ti tawp tura an duh tih thuziak a awm. Thudik a ni thei lo. Ka hriat chinah tumahin heti lam hawi zawng hian min hrilh lo. 

"Inkhelh theih tura a him veleh season hman zawh kan duh. Inkhel turin ka inpeih a, team pawh a inpeih. Inelna tihtawp a la hun lo," tiin NBA chu khelh chhunzawm theih a beisei thu a sawi.

Dallas Mavericks neitu Mark Cuban pawhin, "NBA kal zel dan tur chungchangah thu thar a awm lo. Thil awm thei dang zawng zawng thlir chungin thutlukna siam a ni ang," tiin a sawi. Cuban hian entu mipui an awm theih a beisei tawh lo a, TV kaltlanga en theih turin inelna chhunzawm theih a la ring.

Hetihlai hian Oklahoma City Thunder general manager Sam Presti chuan NBA ṭan hun tur a la hriat loh thu a sawi a, basketball aiin nunna a pawimawh zawk thu a sawi lang bawk.