Bundesliga-in an nghah rih a la ngai

German rama football inelna sang ber Bundesliga chu khelh chhunzawm theih beisei mah se an nghah leh rih a la ngai dawn. Chancellor Angela Merkel chuan May 6 hian infiamna chungchang thu thar an puan tur thu a sawi.

Covid-19 vangin Bundesliga hi March thla laihawl aṭang khan an chawl lawilawk. April thla chawhnu lam aṭang khan German club ten training an nei leh tawh a, tun hma lama inbuatsaihna hautak an neih ang erawh a la ni lo.

League hi match kua ṭheuh khelh hmabak an la nei, champion lai Bayern Munich chuan Borussia Dortmund lakah point liin hma an hruai mek, an dinhmun hi inthlak danglam viau thei a la ni.

German Football League (DFL) hian sponsor leh broadcaster lam nena inremna an neih danah June 30-ah chuan league khelh zawh tawh tur a ni. League hi an zo thei lo a nih chuan club tam takin sum leh paiah harsatna nasa zawk an tawk thei dawn.

DFL beisei dan chuan May 9 aṭanga Bundesliga hi khelh zawm leh tur a ni. Mahse tuna a lan dan chuan a hma berah pawh May 16 emaw 23 emaw velah an zawm theih hmel chauh.

German ramah hian hri leng vangin October 24 thleng punkhawmna lian tham chu khap vek a ni a, league hi an khel zawm a nih pawhin entu nei loa an khelh a ngai ang.