Entu awm loin Hungarian GP

Formula 1 Hungarian Grand Prix chu kumin atan entu awm loa tlan a ni dawn, fans an awm loh chhan hi Covid-19 in kai darah zel tur inven nana tih a ni.

Hungary sorkar chuan an ram chhungah August 15 thleng mi 500 aia tam punkhawm an khap; inelna buatsaihtu lam chuan, "Intlansiak a awm theih nana tih tur ṭul zawng zawng chu kan ti ang.

"Tuna duh thlan tur kan neih chhun chu fans awm loa inelna neih a ni. Sumdawnna leh thil dangah hloh tur awm nual mah se thuneitu lam duh dan kan zawm a ngai," tiin an sawi.

Hungarian GP hi ruahman dan chuan August 2-a tlan tur a ni. Amaherawhchu, hri leng vangin March thla a ṭan tur season pawh an la tlan ṭan lo a, calendar ennawn a ngaih dawn avangin a hun hi sawi chian theih a ni lo.

Season hmasa Hungarian Grand Prix-ah khan Lewis Hamilton chuan hnehna a chang a, Mercedes driver hian a vawi ruk nan world championship nomawi a chawi zui bawk.