MFA Super Cup-ah Chhinga Veng an ṭha ber

Lalbiakliana Memorial MFA Super Cup final-ah Chhinga Veng FC chuan Chanmari West 5-0 a hnehin an champion.

Chhingcows hian nomawi duhin transfer laiin Mizo pla­yer ṭha an senglut a, coach Lal­sangzuala Hmar kaihhruaina hnuaiah inelna hmasa berah nomawi an chawi nghal.

Nimin Lammuala inkhel­ah hian Chhinga Veng tan Mal­sawm­­fela'n hattrick a siam a, Lal­dingngheta leh R. Mal­sawm­tluanga ten goal khat ve ve an khung.

An inlan dan
Chanmari West coach Zara'n hrem vanga khel thei lo left back Calvin Zosiamliana aiah Vanlalnghenga a luhtir a, player dang 10 chu Mizoram Police hnehtute an ni. Serchhip tlangval Nghenga tan final hi MPL club tana a vawi hnih bul ṭanna chiah a ni.

Chhinga Veng player-ah hrem an awm lo a, coach Sanga'n semifinal-a Venghlui hnehtute aṭangin player pahnih a thlak. Lalrammuanpuia aiah Laldingngheta a inlan a, Hmingthanmawia aiah Ramfangzauva chu left back-ah chhawr a ni bawk.

Goal thum phawt
Chhum zing hnuaiah inkhelh ṭan a ni a, minute thum chhungin vawi hnih an chawl hman.

Chawlh a tam avangin inkhel a nung lawk lo a, minute 30 chhunga langsar ber chu Chhingcows midfielder R. Malsawmtluanga a ni.

Msa hian goal kham chung a pet per bakah chance ṭha a insiam hnuah goal zawnah a pet lo. Darkar chanve chhung hian Chhingcows an chungnung fal lo a, team pahnih an fimkhur.

Minute 31-naah Msa corner pet Chanmari West keeper Malsawma'n a man nghet zo lo a, hemi aṭanga ball kal zel chu Dingngheta'n goal-ah petin West Warrior keeper-in dang mah se a per chu Sawmfela'n a pet goal.

Goal khat luh hnuah inkhelh dan hmang a danglam a, Chanmari West tlarhnung lam insiam ṭha loin an muthlu zui. Sawmfela'n minute 34-naah goal hnihna a khung a, minute 35-naah Dingngheta'n defender tihsual zarah awlsam takin a khung leh bawk.

First half tawp hmain Ding­ngheta'n duhsak takin Sawm­fela a siam a, Ramhlun South tlangvalin khung lo mah se first half-ah Chhinga Vengin 3-0 in hma an hruai tho.

Sawmfela a vul
MPL5 best player leh best forward ni kawp thei Sawmfela'n Chanmari FC a champion pui hnuah Chhinga Veng a zawm a, nomawi a chawipui nghal.

Ramhlun South tlangval hian first half-a goal hnih a khung hnuah second half ṭan aṭanga minute lina lekah a tauh goal lehnghal.

Sawmfela hian tun inelnaah goal 11 khungin a pet goal tam ber a, player ṭha rual awmkhawmnaa a langsar thei hian a thiam tih a nemnghet. Chhinga Veng forward hi a phu ang ngeiin best forward ah thlan a ni.

Hei le Msa
Minute 78-naah midfielder hmuhnawm Msa'n hla tak aṭangin West Warrior keeper a pet khum a, goal mawi bik a ni.

Chhinga Veng midfielder Msa hi best midfielder-ah thlan a ni a, final chauh loah pawh player pawimawh a ni.

Rinchhana leh Ṭpa-a
Mizoram captain Lalrin­chhana Tochhawng-in Chanmari aṭangin Chhinga Veng a zawm a, captain armband a hreng nghal. Rinchhana hian tlarhnung a tihphui ṭhat bakah team a kaihruai ṭha a, best defender ah thlan a ni.

Best goalkeeper-ah Mi­zoram Police goalkeeper Lalṭanpuia thlan a ni. Ramhlun North tlangval hi tun season aṭangin Police first keeper a ni a, semifinal-a penalty shoot out a an chak loh ṭum thlengin a khelṭha.

Coach a lawm
Chhinga Veng coach Lalsang­zuala Hmar-in Bethlehem Vengthlang a enkawl laiin MFA Super Cup a chawi tawh a, season liam ta khan Chanmari FC enkawlin pahnihna a ni a, kuminah a vawi hnih nan a champion.

Chhingcows coach Sanga chuan, "Final hi tun inelnaa kan khelh ṭhat ber ṭum a niin ka hria a, hei hian champion kan duhzia a pholang. Kan champion theihna kawnga pawimawh kan hruaitute, min ṭantu ruhkawl Chhingcows bakah min sponsor-tu Rafael Enterprise leh JSJ Fitpro chungah kan lawm hle a ni," tiin a sawi.

Sanga chuan sawi chhun­zawmin, "Mizoram hmeichhe team kan enkawl avangin Shillong-ah kan zin a, hemi chhung zawng hian Anand Gurung-a'n training a pe. Tuna kan champion hi Anand-a tan ka hlan," tiin amah puitu assitant coach Anand Gurung a fak.

Mipui an pui
Chhinga Veng ṭantuten ṭan phat aṭangin thawm an nei ṭha a, khelmual lamah an chungnung bawk avangin minute 90 chhung thawm an nei.

Chhingcows hian hla chi hrang hrangin an club an au phur a, MFA Super Cup-a ṭantu nei ṭha ber lawr lak an ni.

Champion Kalkawng
CHHINGA VENG
Zarkawt FC 0 - 9 Chhinga Veng FC
CHH : Malsawmfela 6' (P), 58'; Ramfangzauva 16'; Lalrammuanpuia 32', 41'; Laldampuia 65', 66'; MS Dawngliana 79'; Lalchhuanpuia 87'
Zo Dreams FC 0 - 14 Chhinga Veng FC
CHH : Lalchhuanpuia 18', 77'; Malsawmfela 29', 42', 50'; Lalrinchhana Tochhawng 31', 54'; MS Dawngliana 48', 87'; R. Lalawmpuia 58; Laldampuia 61'; Zosangliana Sailo 73'; Shalom Lala 74'; Lalrammuanpuia 89'
Chhinga Veng FC 14 - 2 Chawnpui FC
CVFC : R. Malsawmtluanga 5', 66'; R. Laldinliana 41'; Laldampuia 45+2 ',61' ,63', 68'; Laldingngheta 51', 86'; MS Dawngliana 70', 81'; K. Lalthlahlova 75;
Malsawmfela 89', 90'
CPFC: Lalthansanga 14'; Zarzokima 26'
Chhinga Veng FC 1 - 0 Bethlehem Vengthlang FC
CVFC : K. Lalthlahlova (Patea) 37'
Chhinga Veng 3 - 2 Venghlui FC
CVFC : Malsawmfela 43'(P); H. Lalrohlupuia 60' (OG); MS Dawngliana 62'
VFC : Vanrammawia Ngente 6'; K. Lalthlahlova 14' (OG)
FINAL
Chhinga Veng 5 - 0 Chanmari West
CVFC : Malsawmfela 31', 34', 49'; Laldingngheta 35'; R. Malsawmtluanga 78'
LAWMMAN
Champion Rs 2,00,000
* Chhinga Veng FC
Runners up Rs 80,000
* Chanmari West FC
Semi Finalists Rs 20,000
* Mizoram Police, Venghlui FC
Quarter Finalists Rs 8,000
* Bethlehem Vengthlang FC, Durtlang Leitan, Aizawl FC Academy, Dinthar FC
Round of 16 Rs 4,500
* Venghnuai, Chawnpui FC, Sailam FC, Ramhlun FC, Ramhlun North FC, Aizawl FC, Zauva Memorial FC, Ramthar Veng FC
Round of 32 Rs 2,500
* Bethany FC (Bawngkawn), Durtlang FC, Zo Dreams FC, FC Armed Veng South, Melriat FC, Lungverh FC, Piler FC, Saikhamakawn, MFA Grassroots, FC Ramthar (Durtlang), FC Khatla, Kolasib Ṭumpui GSA, Hming Hming FC, Kanan FC, Chite Veng GSA, Chaltlang FC
Fair Play Rs 20,000
*Chhinga Veng FC
MIMAL LAWMMAN
Best Goalkeeper Lalṭanpuia, Mizoram Police
Best Defender Lalrinchhana Tochhawng, Chhinga Veng
Best Midfielder R. Malsawmtluanga, Chhinga Veng
Best Forward Malsawmfela, Chhinga Veng
* Mimal Lawmman dawngtute hian Rs 3,000 ṭheuh an dawng.
GOAL KHUNG TAMTE
Hming Club Goal
Malsawmfela Chhinga Veng FC 11
Vanrammawia Ngente Venghlui FC 10
Lalnunmawia Chanmari West FC 9
Lalfakzuala Mizoram Police 8
Laldampuia Chhinga Veng FC 7
MS Dawngliana Chhinga Veng FC 6
Lalbiakhlua Mizoram Police 5
K. Roluahpuia Venghlui FC 5