Penalty-ah United-in Real hneh
Pathianni zan friendly match khelhah Manchester United leh Real Madrid te chu Santa Clara-ah 1-1 in an inhnehtawk a, penalty shootout-ah English club 2-1 in an vannei.
Europa League champion leh Champions League champion te hi season ṭan hmain UEFA Super Cup-ah an inhmachhawn leh dawn. Philip II Arena, Skopje-ah August 8, Thawhlehni zan dar 12:15-a an intawn leh hunah chuan team ṭha ve ve an luhtir tawh ang.
Martial a 'sial'
Real Madrid manager Zinedine Zidane-a'n Champions League final-a Juventus an hmachhawn ṭuma bul ṭantu aṭangin player pariat a khelh tir a, tel lo langsar ber chu Confederations Cup khel Cristiano Ronaldo a ni. United manager Mourinho-a'n bench-ah khawvel player manto ber Paul Pogba leh pound maktaduai 75 man striker Romelu Lukaku a dah ve bawk.
Levi's Stadium-ah Marcus Rashford chu Real tan ven tham a tling a, player hmuhnawm ber erawh Anthony Martial a ni. French forward Martial hian vei lam kilah Real player pathum bumin Jesse Lingard tan ball ṭha a pe a, first half injury time-ah English midfielder hian goal ruakah United hmahruaina goal a khung.
Second half-ah pound maktaduai 31 man defender Victor Lindelof a rawn lut a, Swede defender Lindelof hian penalty area-ah chiang zetin Real wing back thar Theo Hernandez a pet tluk avangin penatly a chawi a, Casemiro-a'n siphurh sut nan a hmang.
United midfielder Ander Herrera chu second half minute ruk lek a inlan hman tihin inhliam vangin academy player Scott McTominay-a'n a thlak. Minute 90 chhungin 1-1 in an inhnehtawk.
Real awh De Gea
United tana penalty pet hmasa bertu Martial-a'n a pet over nghal a, Real tana petu Mateo Kovacic pet chu David de Gea-a'n a dan sak. United rawlthar Mc Tominay pet chu Real keeper Kiko Casilla-a'n a dang zui a, Real academy chhuak freekick specialist Oscar pawhin De Gea venah a pet goal thei lo - vawi hnih ve ve pet zawhah 0-0 a ni.
English club tan Henrikh Mkhitaryan-a'n a vawi thumnaah a pet goal a, Real lamin Quezada hmangin an chhanglet. United player thar Lindelof-a'n goal laiah petin a goal lo a, Real player thar Theo-a'n a pet out bawk. A panganaa pen chhuak Daley Blind-a'n goal laiah rawn pet nawn sakin goal net a puar a, hun pangngaia Real siphurh suttu Casemiro-a'n goal zawnah a pet nawn thei lo.
Penalty pettu 10 zinga pasarihin an pet goal lo a, Real Madrid chil tiputtu De Gea-a'n a indah itawm leh sawt a, amaherawhchu Jose Mourinho-a'n Spanish keeper hian tun season-ah United a chhuahsan loh tur thu a tichiang tawh.
Mourinho nge nge
Player chhan thiam tak Jose Mourinho chuan, "First half-ah Real-in team ṭha an luhtir a, ṭha takin kan khel. Second half-ah erawh kan phurna a reh a, Real naupang rual hmachhawn châkna an nei tawk lo. Second half-a inlante khan Real team ṭha ber an khelhpui lo kha an hnual a ni," tiin a sawi.
Penalty chungchang sawiin Mourinho chuan, "Penalty 10 aṭangin pathumin an pet goal a, kei chuan penalty pet thiam ho ka thlang lo a ni," a ti.
Real coach Zinedine Zidane chuan, "Friendly match-ah chuan result hi a pawimawh ber a ni lo. Keini lam chuan kan official game hmasa ber August 8-a European Super Cup kan khelh tur hi kan ngai pawimawh a, hemia chak thei tura kan inpeih hman a ṭul a ni," tiin a sawi.
Tute nge khel?
REAL MADRID (4-3-3): Navas; Carvajal (Hakimi 46'), Varane (Quezada 46'), Nacho (Manu 46'), Marcelo; Modric (Kovacic 46'), Kroos, Isco (Oscar 46'); Vazquez (Hernandez 46'), Benzema (Gomez 46'), Bale (Franchu 46').
Inlan lo : Tejero, Gomez, Casilla, Mayoral, Zidane, Yanez.
MAN UTD (4-1-4-1): Romero (De Gea 46'); Fosu-Mensah (Blind 46'), Bailly (Smalling 46'), Jones (Lindelof 46'), Darmian (Valencia 77'); Carrick; (Pogba 46') Lingard (Mkhitaryan 46'), Fellaini, A Pereira (Herrera 46', McTominay 52'), Martial; Rashford (Lukaku 46').
Inlan lo : Tuanzebe, J Pereira, Valencia, Mitchell.