AFC U23 Qualifier Turkmenistan hnehtu India-in Qatar an mangṭha

Pathianni zan khan India Under 23 chuan 2018 AFC Under 23 Championship qualifier-a an match hnuhnung ber an khel a, Turkmenistan chu 3-1 in an hneh.

India U23 tan Jerry Lalrin­zuala chuan penalty aṭangin goal khat a khung a, goal hnih dang hi Manvir Singh leh Alan Deory-te khung a ni. India-in hnehna chang mah se kum 2018-a AFC U23 Championship khel tur erawhin beisei tur an nei tawh chuang lo a, an match hmasa pahniha Syria leh Qatar an ngam loh an tuar.

Mizo inlan

India coach Stephen Con­stan­tine-a'n friendly match-a captain armband an hrentir hnuah Lalruatthara chungah a rinna a nghat nawn a, match hmasa bera Syria an hma­chhawn ṭumin captain-ah a hmang nawn. Mahse, India-in Qatar leh Turkmenistan an hmachhawnna inkhelah erawh Hmunhmelṭha tlangval-in bench-ah hun a hmang tluan.

Daniel Lalhlimpuia-a'n match hmasa pahnih khel mah se Turkmenistan lakah erawh a inlan lo a, Jerry Mawi­­hming­thanga leh Sairuat­kima ten qualifier chhungin khelmualah an hmel an lan lo bawk. Lallianzuala Chhangte erawh Syria laka starting eleven a chan loh hnuin Qatar leh Turkmenistan lakah inkhel bul a ṭan ve ve a, Jerry Lalrinzuala'n starting eleven-a hmun chang chungin match thum a khel kim vek.

Bulṭanna

India-in beisei tur an nei tawh lo tih inhre mah se chak nei lo chunga an puanthuah tel an duh lo a, Turkmenistan lakah chak duhna thinlung nen an khel. India tan Germanpreet Singh-a'n hun ṭha nei nghal mah se goal-ah erawh a chantir thei lo a, India-in an tuar nghal.

Minute 13-naah Turkmenis­tan-in chance an nei ve nghal a, an khawhral ve duh lo. Hoshgel­di chuan yard 30 vela hla aṭangin free kick a pet a, Vishal Kaith-a tan dan theih lohin a lut. India-in tlawm an duh lo, Lallianzuala Chhangte hmangin chance an nei nghal a, mahse Lunglei rawlthar hian goalkeeper Dovletyar Berdiyev chauh a hmachhawn hnuah a pet goal thei lo. Minute kua naah India-in goal an khung ta nge nge a, Manvir Singh-a'n a ṭhiante angin a hun ṭha neih a khawhral ve lo.

Chhandamtu Alen

Stephen Constantine-a'n second half-ah thutlukna dik a siam a, Mumbai rawlthar duhawm tia an sawi ṭhin Hitesh Sharma la chhuakin Alan Deory chu minuteb 68-naah a luhtir. Khelmualah minute li chauh hun a hmang hman tihin Shillong Lajong winger hian goal a khung nghal a, India-in 2-1 in hma an hruai.

India an phur tulh tulh. Minute 77-naah Turkmenistan defender-in penalty area-ah a kuta ball a khawih fuh avangin penalty a chawi a, a pet tura lo ding chhuak chu Jerry a ni. Bethlehem rawlthar hian boruak sangah pawh a talbuai lo tih pholangin goal-ah a chantir a, Turkmenistan-in a chhanna tur an nei tawh lo - India an chak.

Constantine a lawm

India coach Stephen Con­stan­tine chuan, "Match tin

aṭangin hmasawnna hmuh tur a awm zel a, Turkmenistan laka hnehna kan chan theih avangin ka lawm takzet a ni. Ni e, a tawpah hnehna kan chang ve ta hram a, mah se kan khelh dante kha kan thlir kir chuan Syria kan hneh lo kha kan vanduai a, Qatar lakah kan vanduai lehzual. Ka naute an thawkrim a, hnehna chan kan phu a ni," a ti.

English coach chuan Indian football-in hma a sawn thu sawi nghalin, "Tun hnai kum hnih chhungin hmasawnna hmuh tur a tam em em a, India senior team chu AFC Asian Cup khel thei dinhmunah kan ding mek. A pawimawh ber erawh AFC Asian Cup khel tura inpetkai fo a ni a, chumi hnuah World Cup pawh kan thlir ve thei ang," tiin a hmachhawp a sawi.