Chelsea captain thar Cahill
Antonio Conte chuan season thara Chelsea captain atan Gary Cahill a ruat thar. Blues manager hian a player zingah captain ni thei tur khawpa hruaitu ṭha an tam thu a sawi.
England international defender hi season hmasa pawh khan Blues captain arm band hrengtu a ni tawh a, captain tak erawh John Terry a ni. Mahse, Terry hi a kum a tam tawh bakah hliam a nei fo a, khelmualah a luh tam loh avangin Cahill hi hun tam zawkah chuan hruaitu a ni.
Kum 31 mi Cahill hian Bolton Wanderers aṭangin kum 2011 khan Chelsea a zawm a, inelna hrang hrangah match 239 khelin goal 25 a khung tawh. Stamford Bridge-a a cham chhung hian Premier League nomawi pahnih leh FA Cup pakhat a chawi tawh.
Juventus manager hlui Conte chuan, "Cahill hi khelmual chhunga a luh chuan hruaitu ṭha tak a ni a, season tharah pawh a kaihhruaina hnuaia khelh chhunzawm hi duhthlanna dik a ni ang," tiin a sawi. Conte hian Cesar Azpilicueta, David Luiz, Thibaut Courtois leh Cesc Fabregas te chu captain ni thei tura theihna nei vek an nih thu a sawi tel bawk.
Conte chuan sawi chhunzawmin, "Blues tana hun rei tak khel tawh Terry kan chan tawh a, a hmunruak a zau dawn hle. Player tinin puitlin lam an pan mek vek a, an zingah hian hruaitu ni tura ṭha leh theihna nei sang an awm nual. Kan inpumkhatna a ṭhat avangin season thar khelh hlan kan nghakhleL tawh hle," a ti.
Premier League champion Chelsea hian nimin khan Singapore an thleng a, vawiin tlai dar 5:05 hian Bayern Munich nen an inkhel dawn, season thar inbuatsaih nana an match hnuhnung atan Inter Milan an la hmachhawn leh bawk ang.