Indian Super League Indian player-te hlawh tur vaibelchhe 48.85
Pathianni khan Indian Super League draft neih zawh a ni a, ISL club 10 ten players 205 duhthlan tur an neih aṭangin 134 an lei. Club-in player an chelh theih aṭanga player an chelh zat belhkhawm chu 22 a ni a, ISL-a Indian player khel tur zat hi an vaiin 156 an ni tihna a ni.
ISL draft-a player 134 lei nana club-te sum sen zat chu vaibelchhe 37.33 a ni a, player 22 an chelh beh nen club-ten tun season atana sum an sen zat belhkhawm chu vaibelchhe 48.85 a ni. ISL hmasa ber kum 2014-ah khan draft-a club te sum sen zat chu vaibelchhe 24 a ni a, ISL hmasa ber aṭanga khaikhinin kuminah Indian player-te hlawh chu 103% in a pung.
Bengaluru an hausa
I League champion hlui Bengaluru FC-in ISL-ah pawh an 'te' lo tih sum hmangin an pholang nghal a, Indian player lakluh nana sum seng hnem ber an ni. Bangalore club hian Indian player 17 kawl turin vaibelchhe 6.01 an seng a, an sum sen tam chhan pakhatah kum khata nuai 150 hlawh tur Sunil Chhetri chhiar hmaih chi a ni lo.
Lalruatthara leh Lalṭhakima khelhna tur Kerala Blasters chu Indian player-a sum seng hnem dawttu an ni a, vaibelchhe 5.93 an seng. Lalrindika Ralte, Lalrempuia Fanai leh Robert Lalthlamuana-te khelhna tur NorthEast United chu sum seng tlem ber an ni a, John Abraham-a club hian Indian player 15 lak nan vaibelchhe 3.66 an inseng a ni.
Mizo player hlawh
Indian Super League draft-ah Mizoram player 14 hralh an ni a, Chennaiyin FC-in Jeje Lalpekhlua leh Jerry Lalrinzuala an chelh bakah Bengaluru FC-in Malsawmzuala an chelh sa bawk avangin ISL-a Mizo inlan tur zat chu 17 an ni tihna a ni. Jeje Lalpekhlua'n Chennai club tan season khatah nuai 140 a hlawh dawn a, hlawh hnem ber tur a ni.
Lalrindika Ralte-in season khata a hlawh tur hi nuai 50 a ni a, Jeje dawta Mizo player hlawh hnem a ni ang. Lalchhuanmawia Fanai chuan nuai 45 hlawhin goalkeeper Lalthuammawia Ralte chuan nuai 37.5 a hlawh dawn bawk. Mizo player dang zingah nuai 30 hlawh phak an awm lo.
Sum ngah ngah
"Football hi eizawnna tlak a ni lo," tia sawitute chuan an ngaihtuahna an sen ṭhat a ṭul ang. ISL-a Indian player-ten kumina an hlawh tur belhkhawm chu vaibelchhe 48.85 a ni a, heta ṭanga Mizo player-te hlawh tur zat belhkhawm chu nuai 474.5 a ni - Jerry Lalrinzuala hlawh chhut tel a ni lo.
Season hmasaa Chennaiyin FC tana khel Jerry hi South Indian club hian Jeje nen an chelh a, mahse contract a la ziak lo. ISL leh I League-a a season hmasa bera Emerging Player of the League ni ve ve thei defender hian August-ah contract a ziak dawn chauh a, a hlawh tur zat a la chian theih rih loh thu Vanglaini a hrilh.
College to ISL
ISL draft-ah Indian player 71 ngawtin duhtu an neih loh laiin college zirlai Ajith Sivan chu Kerala Blasters-in an club tana khel turin an lalut thung! Sivan hian a luhna Nirmala College tan Reliance Foundation Youth Sports football championship-ah a khel a, ISL scout-te mit tlungin draft-ah telh a ni.
Kum 20-a upa midfielder hi India coach Stephen Constantine pawhin AFC U23 Qualifier khel tura inbuatsaih lai khan probable squad-ah a lo ko tawh bawk. ISL-a Kerala Blasters inkhel en ziah ṭhin midfielder mumang chu Pathianni khan a tak ramah a chang a, a club ṭan em em hian nuai rukin an lalut.
Hmabak chu
Indian Super League club tan a tam berah Indian player 18 bak neih phal a ni lo a, a tlem berah player 15 tal neih tur a ni bawk - Indian player zingah hian Under 21 player pahnih an awm ngei ngei a ṭul. ISL club zingah Indian player neih theih zat tam ber 18 nei pha an awm lo a, Indian player kawl hnem ber Bengaluru-in ramchhung footballer 17 an kawl.
Amar Tamar Kolkata, Delhi Dynamos, FC Goa, Jamshedpur FC leh NorthEast United FC-ten Indian player 15 ṭheuh an kawl a, Chennaiyin FC, Pune City, Kerala Blasters leh Mumbai City-ten 16 ṭheuh an kawl bawk. ISL club te hian foregin player a tlem berah pasarih, a tam berah pariat an nei thei a, rampawn player-a an sum sen theih zat chu vaibelchhe 12.5 a ni. ISL club ten hlawha sum sen theih zat vaibelchhe 18 aṭangin vaibelchhe 11 chuang an la nei vek a, ram pawn players langsar tak tak kan la hmu nualin a rinawm.
Khawiah nge Mizo?
Indian Super League club zingah NorthEast United leh Bengaluru FC chu Mizo kawl hnem ber an ni dawn. Higlanders-ah hian Mizo player pathum Didika, Robert leh Rempuia te an khel ho dawn a, Bengaluru-in Lalthuammawia Ralte, Zohmingliana Ralte leh Malsawmzuala an kawl thung ang. ISL club zingah Mizo player kawl miah lo pahnih an awm a, Amar Tamar Kolkata leh FC Goa an ni - ISL ṭantirh aṭang tawh khan FC Goa-ah hian Mizo player an la khel ngai lo.
Jamshedpur FC (Jerry Mawihmingthanga & Sairuatkima), Delhi Dynamos (Lallianzuala Chhangte & Sena Ralte), Kerala Blasters (Ruatthara & Ṭhakima), Chennaiyin FC (Jeje & Jerry) leh FC Pune City (Chhuantea & Isaac Vanmalsawma) ten Mizo player pahnih ṭheuh an kawl dawn a, Mumbai City-ah Lalchhawnkima a khel bawk ang.