Khawvel defender manto ber Mendy

Manchester City chuan AS Monaco defender Benjamin Mendy chu khawvela defender manto ber ni turin an lalut - a man zat hi pound maktaduai 52 a ni. Kum 23-a upa left back hian Etihad Stadium-ah kum nga cham turin contract a ziak.

City director of football Txiki Begiristain chuan, "Khawvela full back ṭha ber pawl a ni a, left back a khel tura lakluh ka tum hmasak ber a ni," tiin French defender lakluh an tumna lamah khawdang an hawi loh thu a sawi.

Season hman zawh taka Monaco tan match 34 khela kum 17 hnua Ligue 1 nomawi chawipuitu Mendy chuan, "Manchester City ka zawm thei hi ka hlim takzet. Europe-a club langsar ber pawl an ni a, Pep Guardiola hnuaia an attacking football hi a ṭha em em bawk. Kan hma kum lo awm turah hlawhtlinna tam tak kan chhar theih ka beisei a ni,"a ti.

Manchester City-in nipui transfer-ah England international Kyle Walker (£45m), Portugal midfielder Bernardo Silva (£43m), Brazilian keeper Ederson Moraes (£35m) leh Brazilian defender Danilo (£26.5m)-te an lalut tawh a, pound maktaduai 200 chuang an inseng tawh.