Premier League Club Bihchianna Chelsea - John Terry leh Frank Lampard

Chelsea hi kum 115-a upa a ni tawh a, Premier League ṭan hnuah an vanglai hun an tawng. Russian billionaire Roman Abramovich-a'n kum 2003 khan London club hi a lei a, sum hmangin player ṭha an lalut a, manager ropui Jose Mourinho sulhnu erawh hmuh hmaih a thiang lo.

Premier League ṭan hnuah Blues hian league nomawi vawi nga an chawi a, 1969-70 season khan First Division-ah an champion tawh bawk. FA Cup-ah pawh vawi riat champion tawhin heng zinga pasarih hi Premier League ṭan hnu a ni.

Europe inelnaah pawh 2011-12 season khan Champions League nomawi an chawi a, Europa League pawh vawi hnih an chawi tawh. Blues-in player ropui an ngah a, hming pahnih thlanchhuah tur a nih chuan John Terry leh Frank Lampard aia phu an awm chuang lo.

Chelsea legend John Terry chuan October 7, 2018 khan football khelh a chawlhsan thu a puang a, hetah hi chuan Blues player ni loin Aston Villa player a ni tawh thung.

English defender ṭha Terry hian Chelsea kawr hain a football career hi ti tawp se a ropui zawk ngei ang, amaherawhchu inkhelh a la châk miau avangin Blues tana season 19 chhung a khelh hnuah season khat lek Villa-ah a hun a hmang.

Terry hi December 7, 1980 khan Barking, England-ah a piang a, a naupan lai hian Sunday League-ah Senrab tan a khel ṭhin. He league-ah hian Premier League player lar ni zui ta -  Sol Campbell, Jermain Defoe, Bobby Zamora, Ledley King leh Jlloyd Samuel te pawh an khel ṭhin.

West Ham academy-ah kum nga dawn a awm hnuah Terry hian Chelsea academy a zawm a, kum 1998 khan senior tana match hmasa ber a khel a. Intuai hriam turin Nottingham Forest-ah season chanve chhung hun a hmang.

Jose Mourinho-a'n Chelsea a enkawl khan Terry hi captain atan a ruat a, Blues-in hlawhtlinna an chan theih nan player pawimawh a ni a, Premier League-ah vawi 492 a inlansak a, club record chelhtu a ni.

Terry hi Blues captain hlawhtling ber a ni a; Premier League nomawi pali, FA Cup pali, League Cup pathum, Champions League leh Europa League-ah a champion pui bawk. FIFA FIFPro World XI-ah pawh a serh zinga mei ang a ni a; 2005, 2006, 2007, 2008 leh 2009 te kha a tel. Terry hian UEFA Club Defender of the Year pawh vawi thum a la.

English defender hi 2004-05 khan PFA Player of the Year-ah thlan a ni a, defender nichunga mimal chawimawina a la thei hi a ropui hle. Terry-a'n football khelh a chawlhsan khan, "Kum 14 mi chauh ka nih lai khan ka hringnuna thutlukna lian ber ka siam a, Chelsea Football Club ka zawm. He club-in ka tana thil ṭha tih leh hlimna min thlen zawng zawng hi thu hmanga sawifiah theih a ni lo," tiin a sawi a, Chelsea ṭantute pawhin an player ropui hi an theihnghilh ngai lo ang.

English midfielder zinga goal khung thei ber pawl, Chelsea chanchina midfielder ni chung sia goal khung hnem ber Frank Lampard-a hi Blues player ropui a ni a, manager ropui a ni thei ang em tih erawh hunin a hril ang.

June 20, 1978-a piang English midfielder hian West Ham United aṭangin bul a ṭan a, Youth team-ah a hming ziak lutin hetihlaia West Ham assistant manager chu a pa Frank Lampard Sr. niin West Ham tana a vanglai hun hmang zo tu a ni. West Ham tan a senior game hmasa ber January 31, 1996-ah khelin hemi season-ah hian game khat dang bak a inlan tawh lo.

Hammers tan game 187 a khelha goal 39 zet a khung hnuah 2001 season ṭan dawnah Chelsea a zawm. Blues tana a Premier League match hmasa ber chu August 19, 2001 khan khel ṭanin hawi kir zai a rel tawh lo. Chelsea tan match 648 a inlanah goal 211 a khung a, Chelsea chanchinah ani aia club tana goal khung hnem an la awm lo.

Chelsea-in a contract thar an pawh seisak loh avangin MLS club New York City a zawm a, mak takin Manchester City kawr hain Premier League-ah a rawn kir. Kum 36 mi ni chungin City midfielder pawimawh a ni a, game 38 inlanah goal riat a khung hram a. Premier League match a khelh hnuhnung bera Southampton an hneh ṭumin Lampard hian goal a khung.

Lampard hian Man City zawhah New York City a pan a, February 2, 2017 khan football khelh a chawlhsan. Super Frankie-a'n inkhelh a chawlhsan hian sawmtu a la ngah hle.

England tan match 106 khela goal 29 khungtu Lampard hian Premier League, League Cup, FA Cup, Champions League leh Europa League te a chawi kim a, trophy lian tham 13 zet Chelsea tan a chawi.

Mimal chawimawina pawh Frankie hian insawitheihpui tham a dawng nual a, Premier League Player of the Season 2004–05, 2005–06, FWA Footballer of the Year 2005, PFA Fans' Player of the Year 2005, England Player of the Year Award 2004, 2005 te hi a langsar zual an ni.

Lampard hian inkhelh a chawlhsan hnuah manager hna a thawk a, Derby County a enkawl hnuah kum 2019 aṭangin Chelsea a enkawl ṭan. Blues tana a khelhpui ṭhin Terry pawh hian Aston Villa-ah assistant manager hna a thawk mek.