World Para Athletics Championship ; India-in gold pakhat bakah medal dang pali a la

Pianphunga rualbuanlote tana buatsaih 2017 World Para Athletics Championship chu Pathianni zan khan kharna neih a ni a, India chuan medal panga a la, medal panga zinga pakhat chu gold a ni.

India hian infiammi 29 a tir chhuak a, an zinga panga chu hmeichhia an ni. Medal panga latu India hi a pumpuiah 34-na an ni. Medal 65 la thei China chu a pumpuiah pakhatna niin an hnungah hian United States (59 medals), Great Britain (39) leh Ukraine (29) te an awm. Ram hrang hrang inlan 92 zinga ram 66 chuan medal an hlawh chhuak.

Medal panga

London, United Kingdom-a neih zawh tak he infiamna khawmpui lianah hian India tan Sharad Kumar leh Varun Singh Bhati te chuan high jump (T-42)-ah silver leh bronze medal an la a, Kumar hian 1.84m-a sang zuangin Bhati hian 1.77m a zuang thung. Bhati hian 2016 Rio Paralympics-ah khan bronze medal a dawng ve tawh bawk.

Sharad leh Bhati ten medal an lak belh takah chuan India-in kumin Para Athletics Championship-ah medal panga a lakna chiah a ni. Sundar Singh Gurjar (Gold), Amit Saroha (Sil­ver), Karamjyoti Dalal (Bronze) ten medal an la bawk a ni.

Gold latu Gurjar

India tan fei khawha gold medal latu Gurjar hi nikum Rio Paralympics-ah khan hun tiam chhunga a thlen hman loh avangin a inlan thei lo a, kuminah erawh harsatna nei loin inelna a hmachhawn a, pakhatna a ni.

Kum 21 mi Gurjar chuan, "Rio-a ka inlan theih loh vang khan ka lungngaiin ka ngui em em a, mahse ka beidawn phah lo. Nitin mai hian inbuatsaihna ka neih chhunzawm a, a tawpah a rah duhawm ka hmuh theih phah ta a ni. Tunah chuan nakuma a neih tur Asian Games atan inbuatsaihna ka nei ṭan zui leh nghal ang," tiin a sawi.

Rajasthan tlangval Gurjar hi kum 1996 khan Karauli district, Rajasthan-ah a piang a, a tirah chuan rualban lohna a nei lo. Infiamna ngaina leh theihna nei sang tak a ni, kum 2015 November thla thleng kha chuan Athlete pangngaite inelna huangah a tel. Mahse, vanduai thlak takin accident vangin a ban veilam chu a kiu bulah a bung a, hemi hnu hian infiamna chawlhsan mai loin Para Athletics huangah a hming a chher chhunzawm ta tho a ni.

Tun hma lamin 8th FAZAA IPC Athletics Grand Prix, 16th Para Athletics National Championship leh 9th FAZZA IPC Athletics Grand Prix-ah te gold medal a la tawh. Para Athletics National Cham­pionship bikah chuan fei khawh bakah, thleng thlawh leh lung denah te gold laiin national record a lo siam tawh bawk.

Para Athletics

International Paralympic Committee-in an buatsaih kumin World Para Athletics Championship hi vawi riat an neihna a ni a, tun hma chuan IPC Athletics World Championship tih a ni ṭhin - kuminah hian medal 213 zet sem chhuah a ni. Ram hrang hrang 92 aṭangin infiammi 1074 an kal khawm.

Inelna vawi riat neih a nih tawh chinah China chu sulhnu nei ṭha ber niin vawi nga ngawt an champion tawh a, United Kingdom leh Russia te chu vawi khat ve ve pakhatna an ni tawh bawk. World Para Athletics Championship hi kum hnih dana neih ṭhin a ni a, kum 2019-a neihna tur hi tih chian la ni lo mah se London hi thleng nawn thei dinhmunah an ding mek.