US Open champion HS Prannoy

Pathianni zana khelh zawh tak US Open Grand Prix Gold badminton tournament mipa singles final-ah Indian shuttler pahnih an inhmachhawn a, HS Prannoy chuan Paru­palli Kashyap laka hnehna changin a vawi thum nan grand prix gold title a la.

Kum 25 mi Prannoy hian inkhel inhnehtawk takah Commonwealth Games gold medallist Kash­yap chu darkar khat leh minute nga chhungin 21-15, 20-22, 21-12 in a hneh a, US Open Grand Prix Gold bikah chuan a vawi khat champion-na chiah a ni.

Semifinal-ah Prannoy hian Vietnam tlangval Tien Minh Nguyen a hneh a, inkhel pakhat zawkah Kashyap-a'n Korean shuttler Kwang Hee Heo a hneh ve bawk.

World number 29 Prannoy chuan, "Inkhel ropui tak chu a ni, game hnihna ka hloh hnuah khan ka talbuai lek lek, Kashyap khan a khelṭha em em a, a tawpah ka vannei hram chauh a ni. Kartluana ka khelh danah ka lawm a, tunah chuan New Zealand Open atan ka rilru ka sawrbing leh tawh ang," tiin a sawi.