Cricket hmeichhe World Cup champion England

England chuan cricket hmeichhe World Cup-ah India hnehin an champion.

Pathiannia final khelhah England-in over 50-ah run 228 an tlin a, India chu chak turin dinhmun ṭha mah se 48.8 overs-ah run 219 siama an thih vek avangin run kuain inelna thlengtu England an chak.

England-in run 228 an tlin theih nan Natalie Sciver chuan half century (51 runs) a siam a, Sarah Taylor-i'n run 45 a vaw chhuak bawk. India-in an target umin opener Punam Raut chuan run 86 zet a vaw chhuak a, amaherawhchu English bowler Anya Shrubsole lakah an tlawm.

Shrubsole hian final-ah run 46 chiah a pe a, wicket ruk a lak zingah India opener pahnih Raut leh Mandhana te an tel. England vice captain Shrubsole hian semifinal-a South Africa an hneh theih nan an chakna run an vaw chhuak tawh a, final-ah hian India-in champion turin ball 39-ah run 33 chiah siam an mamawh a, wicket nga la awm mah se Shrubsole an ngam lo.

England champion puitu Shrubsole chuan, "Ka duhthusam a thleng a, thua sawifiah theih a ni lo. Pressure sang tak hnuaiah result ṭha tak kan hlawh chhuak a, thil thlen dan hi final-a thleng atana duhthusam a ni," tiin a lawm tih a sawi.

India captain Mithali Raj chuan, "England tan pawh a awlsam lo a, amaherawhchu an huaisen rah an seng a ni. Champion thei dinhmunah kan ding ve tho a, hun pawimawhah kan hlauhthawn avangin kan tum ram kan thleng ta lo," tiin a sawi.